Палатаи поёнии парлумони Тоҷикистон имрӯз Созишнома миёни Тоҷикистону Туркманистон дар бораи сохтмони бино (комплекси биноҳо)-и мактаби таҳсилоти миёнаи умумии ба номи Махтумқулӣ дар иттиҳодияи кишоварзии «Эргаш Сулаймонов»-и ноҳияи Ҷиликӯлро, ки моҳи майи соли равон зимни сафари расмии президенти Туркманистон Гурбонгулӣ Бердимуҳаммедов ба Душанбе ба имзо расида буд, бидуни баррасӣ ва якдилона маъқул шуморид.
Вазири маориф ва илми Тоҷикистон Нуриддин Саид зимни суханронӣ назди вакилон дар робита ба ин масъала изҳор намуд, ки мактаби мазкур барои 540 нафар толибилмони туркманзабон аз ҷониби Ашқобод ба маблағи 3,5 млн. доллари ИМА бунёд мегардад. «Тамоми асбобу таҷҳизоти воридшаванда аз хориҷи кишвар ба Тоҷикистон барои сохтмони ин мактабро ҳукумати кишвар аз пардохти ҳама гуна навъи андозҳо озод мекунад», – иброз дошт вазир.
Ба гуфтаи Нуриддин Саид, ҳукумати ноҳияи Ҷиликӯл аллакай барои сохтмони бинои мактаб қитъаи замин ҷудо кардааст.
