– Намояндаи Ҳизби сотсиал-демократии Тоҷикистон (ҲСДТ) ба ҳайати нави Комисссияи марказии интихобот ва раъйпурсӣ (КМИР)-и Тоҷикистон, ки президенти мамлакат Эмомалӣ Раҳмон ба парлумон пешниҳод намуд, шомил нагардид», – изҳор намуд ба «Азия-Плюс» муовини раиси ҲСДТ Шокирҷон Ҳакимов.
Қаблан хадамоти матбуоти сарвари давлат иттилоъ дод, ки ба ҳайати КМИР
намояндагони ҳамаи ҳизбҳои сиёсии
расман дар ҷумҳурӣ бақайдгирифташуда пешниҳод гардидаанд ва 4 нафари онҳо занон мебошанд.
«Ман бар ин назарам, ки намояндаи ҳизби мо ба ҳайати нави КМИР Тоҷикистон ба иллати норасоии иродаи сиёсии раҳбарияти кишвар дохил нашуд», – гуфт муовини раиси ҲСДТ.
Ба гуфтаи Ҳакимов, қабл аз пешниҳоди ҳайати нави КМИР ба тасдиқи парлумон аз ҷониби президент, дастгоҳи сарвари давлат бояд андешаву назари тамоми аҳзоби сиёсӣ оид ба ин масъаларо омӯзад. «Аҳзоби сиёсӣ бояд худашон номзадҳо ба аъзои КМИР аз ҳизбҳоро ба президент пешниҳод намоянд, ки чунин сурат нагирифт ва дар интихоботи парлумонии соли 2010 низ ҳамин ҳолат мавҷуд буд», – иброз дошт ӯ.
Муовини раиси ҲСДТ муътақид аст, ки шомил нагардидани нмояндаи ҲСДТ ба ҳайати нави КМИР, «ин як ҳушдорест ба тамоми комиссияҳои интихоботии кишвар оид ба чӣ гуна рафтор намудан бо ҲСДТ дар маъракаи интихоботи парлумонӣ ва маҷлисҳои маҳаллии вакилони халқ, ки ба моҳи марти соли оянда таъин шудааст».
Дар ҳамин ҳол, рӯйхати пурраи аъзои ҳайати нави КМИР Тоҷикистонро, ки президенти ҷумҳурӣ барои тасдиқ ба палатаи поёнии парлумон пешниҳод намуд, «Азия-Плюс» ояндаи наздик интишор мекунад.
