Пленуми Кумитаи марказии Ҳизби коммунисти Тоҷикистон (ҲКТ) пагоҳ, 27-уми декабр даъват шуда, рӯзномаи анҷумани пешазинтихоботии ҳизбро, ки низ ба соати 10-00-и ҳамин дар шаҳри Душанбе ба кор шурӯъ мекунад, тасдиқ месозад.
Котиби КМ ҲКТ, вакили палатаи поёнии парлумони ҷумҳурӣ Исмоил Талбаков ба «Азия-Плюс» дар ин робита иттилоъ дод, ки дар анҷуман рӯйхати ҳизбии номзадҳо ба вакилӣ аз ҲКТ аз ҳавзаи ягонаи умумиҷумҳуриявӣ ва барномаи пешазинтихоботии ҳизб пешкаши ҳамагон мегардад.
Ба гуфтаи вай, бинобар сабабҳои мушкилоти молиявӣ, ҲКТ рӯйхати комили иборат аз 28 нафарро, ки мутобиқи қонунгузорӣ иҷозат дода шудааст, пешниҳод карда наметавонад. «Ба гумони ғолиб, ба рӯйхати ҲКТ 10 номзад шомил мегарданд», – иброз дошт ӯ.
Зимнан зикр гардид, ки баъди анҷоми кори анҷуман бо иштироки собиқадорони ҳаракати коммунистии Тоҷикистон ба муносибати 90-умин солгарди таъсисёбии Ҳизби коммунисти Тоҷикистон конфронси илмиву амалӣ доир мегардад.
Хотиррасон шуд, ки ташкилоти вилоятии коммунистони тоҷик аз 29-уми декабри соли 1924 дар ҳайати Кумитаи марказии Ҳизби коммунисти Ӯзбекистон дар Ҷумҳурии Мухтори Шӯравии Сотсиалистии Тоҷикистон ба фаъолият оғоз намуда буд.
