Роҳбари Маркази тадқиқоти стратегӣ (МТС)-и назди президенти Тоҷикистон Худойбердӣ Холиқназаров бар ин назар аст, ки Тоҷикистон бояд ҳамаҷониба талош варзад, то ки ба бозичаи дасти кишварҳои абарқудрати ҷаҳон табдил наёбад.
Имрӯз зимни нишасти хабарӣ дар Душанбе ӯ дар ин робита изҳор намуд, ки айни замон кишварҳои абарқудрат баҳри таҳкими нуфузи худ дар минтақаи Осиёи Марказӣ миёни ҳам рақобат доранд.
Ба андешаи Холиқназаров, феълан миёни ин кишварҳо дар минтақа ҷанги сард ҷараён дошта, аз ин рӯ, «мо бояд бикӯшем, ки он ба муноқишаи воқеъии мусаллаҳона табдил наёбад».
«Вақте дар кишварҳои минтақа кадом як ҳолатҳои зуҳури ноамнӣ ба вуҷуд оянд, русҳо маъмулан Ғарбро айбдор мекунанд ва Ғарб бошад, баръакс русҳоро», – иброз дошт ӯ.
Роҳбари Марказ таъкид дошт, ки Тоҷикистон ҷанги шаҳрвандиро паси сар намуд ва «мо ба бори дигар такрор шудани он рӯйдодҳо бояд дигар роҳ надиҳем».
