Гурӯҳи кории ҳукумат таҳти роҳбарии муовини нахуствазири Тоҷикистон Марҳабо Ҷабборӣ бо мақсади шиносоӣ ва омӯзиши вазъи иҷтимоиву иқтисодӣ ва мушкилоти аҳолӣ дар Вилояти Мухтори Кӯҳистони Бадахшон қарор дорад.
Котиби матбуотии раиси ВМКБ Раҳмонқул Раҳмонқулов ба «Азия-Плюс» дар ин робита иттилоъ дод, ки ҳайати гурӯҳи корӣ аз намояндагони тамоми вазорату идорахои кишвар ва аҳли зиёиён иборат аст.
«Гурӯҳи корӣ аз тамоми маҳаллаҳои аҳолинишини вилоят боздид намуда, бевосита бо аҳолӣ, намояндагони аҳли ҷомеа, ходимони дин ва кормандони мақомоти маҳаллии ҳокимияти давлатӣ вохӯриҳо мегузаронад», – иброз дошт ӯ.
Дар ҳамин ҳол, таъкид шуд, ки боздиди гурӯҳи кории ҳукумат аз ВМКБ қаблан тарҳрезӣ шуда, ба сафари ахири моҳи июн пешбинишудаи президенти мамлакат Эмомалӣ Раҳмон ва пешвои маънавии исмоилиёни ҷаҳон шоҳзода Карим Оғо Хони IV ба вилоят рабт надорад.
