Муовини нахуствазири Тоҷикистон Азим Иброҳим рӯзи шанбеи ҳафтаи сипаришуда бо рафти сохтмони навбати дуюми Маркази барқу гармидиҳӣ (МБГ)-и Душанбе-2 аз наздик шинос шуд.
Тавре як манбаъ аз ҳукумати ҷумҳурӣ дар ин робита иттилоъ дод, ӯ аз ҷараёни корҳои сохтмон дар худи иншоот қаноатмандӣ изҳор намуда, лекин аз суръати корҳои бунёди анборҳо барои нигаҳдории ангишт норозигӣ баён кардааст.
Азим Иброҳим таваҷҷуҳи муҳандисоон ва бинокоронро ба васлу насби саривақтии технологияи таъмини бехатарии пурраи иншоот ҷалб намудааст.
Барои кам кардани хароҷоти марбут ба расонидани ангишт аз соҳили чапи дарёи Варзоб ба МБГ тариқи автомобилҳои боркаш, муовини нахуствазир дастур додааст, ки масъалаи ҷорӣ кардани тарзи кашонидани ангишт ба иншоот тавассути зарф бо таноб мавриди омӯзиш қарор дода шавад.
Азим Иброҳим хотиррасон намудааст, ки дар паёми президент ба парлумон аз 20 январи соли гузашта зикр гардид, ки навбати дуюми МБГ Душанбе-2 бо иқтидори 300 мегаватт бояд ахири соли равон ба истифода дода шавад.
