Бо фармони президенти Тоҷикистон аз 2 феврали соли равон бинобар сабаби ба кори дигар гузаштан роҳбари Агентии назорати маводи нашъаовари назди президент (АНМН)-и ҷумҳурӣ генерал-лейтенанти милитсия Рустам Назарзода, ки аз соли 1999 ин сохторро роҳбарӣ мекард, аз вазифааш озод карда шуд.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, генерал Назарзодаро дар Агентии назорати маводи нашъаовар собиқ прокурори генералии ҷумҳурӣ Шерхон Салимзода иваз мекунад, ки аз моҳи марти соли гузашта раҳбарии Федератсияи иитифоқҳои касабаи мустақили Тоҷикистонро ба уҳда гирифта буд.
Бо қарори ҳукумати ҷумҳурӣ, Рустам Назарзода раиси Кумитаи ҳолатҳои фавқулода ва мудофиаи граждании назди ҳукумати ҷумҳурӣ таъин шудааст.
То ин замон Кумитаи мазкурро Хайриддин Абдураҳимов роҳбарӣ мекард, ки ба ҷойи генерал-полковник Саидамир Зуҳуров сардори Сарраёсати ҳифзи сирри давлатии назди ҳукумати ҶТ таъин шудааст.
