Комиссияи марказии интихобот ва раъйпурсӣ (КМИР)-и Тоҷикистон бо мақсади фароҳам сохтани шароитҳои мусоид барои иштироки ҳарчи бештари шаҳрвандон дар маъракаи раъйпурсии умумихалқӣ оид ба ворид намудани тағйироту иловаҳо ба Конститутсия тасмим гирифт, ки шумори номгӯи ҳуҷҷатҳои тасдиқи шахсиятро, ба шаҳрвандон барои гирифтани варақаи овоздиҳӣ ҳуқуқ медиҳанд, зиёд намояд.
Тавре як манбаъ аз КМИР Тоҷикистон ба «Азия-Плюс» дар ин робита иттилоъ дод, дар доираи риояи меъёрҳои қонунгузории амалкунанда ва бо назрдошти пешниҳодҳои иштирокчиёни семинарҳои омӯзишӣ, бо қарори КМИР ба номгӯи ҳуҷчатҳои тасдиқкунандаи шахсият барои гирифтани варақаи овоздиҳӣ ба ҷуз шиноснома, корти идентификатсионӣ, билети ҳарбӣ, шаҳодатномаи ронандагӣ, шаходатномаи хизматӣ, дафтарчаи донишҷӯӣ ва дафтарчаи имтиҳоноти донишҷӯ, ҳамчунин дафтарчаи нафақа, шаҳодатномаи иштирокчии ҶБВ ва собиқадори меҳнат (шахсони баробар ба он) ва шаҳодатномаи маъюбӣ низ дохил карда шудаанд.
Зимнан зикр гардид, ки ҳамин тариқ шумори номгӯи ҳуҷҷатҳои тасдиқи шахсият, ки ба шаҳрвандон барои гирифтани варақаи раъйдиҳӣ ҳуқуқ медиҳанд, ба 9 адад расид.
Қобили зикр аст, ки тибқи ҳисобу китоби пешакӣ, дар маъракаи раъйпурсии умумихалқӣ оид ба ворид намудани тағйироту иловаҳо ба Конститутсияи кишвар, ки ба санаи 22 май таъин шудааст, беш аз 4,3 млн. нафар шаҳрвандони Тоҷикистон ҳуқуқи иштирок карданро доранд.
