Бозии дӯстонаи футбол миёни ҷавонони деҳоти Чоркӯҳи шаҳри Исфара ва Кӯктоши нохияи Бодканди Қирғизистон ба муноқишаву занозанӣ анҷомид.
Тавре як манбаъ аз ҳукумати шаҳри Исфара дар ин робита хабар дод, бозӣ рӯзи 22 январ доир гардида, миёни футболбозон ва мухлисон муноқиша сар мезанад ва ҷавонони аз ҳамдигар норозӣ ба сангпартоӣ сӯи ҳамдигар оғоз мекунанд, ки дар натиҷа чандин нафар аз ҳарду тараф ҷароҳатҳои сабуки ҷисмонӣ бардоштаанд.
Кормандони милитсияи шаҳри Исфара ва ноҳияи Бодканд базудӣ ба ҷойи ҳодиса ҳозир шуда, вазъро зери назорат гирифтаанд ва мақомоти дахлдори ҳарду ҷониб сабабҳои ба вуқӯъ пайвастани ин ҳодисаро таҳқиқ мекунанд.
Субҳи имрӯз фаъолони ҳарду тараф бо ҷавонон вохӯрдааанд, то ки минбаъд ба чунин ҳодисаҳо роҳ дода нашавад.
Ҳамчунин нимаи аввали имрӯз вохӯрии раиси шаҳри Исфара ва ҳокими Бодканд дар назар аст, ки дар он ҳодисаи мазкур баррасӣ хоҳад шуд.
Дар ҳамин ҳол, бино ба маълумоти Радиои Озодӣ бо истинод ба Хадамоти марзбонии Қирғизистон, дар пайи ин муноқиша як манзил ва чаҳор мошини мутааллиқ ба сокинони ду тарафи марз зарар дидаанд.
