Субҳи рӯзи 27 июн Президенти Тоҷикистон Эмомалӣ Раҳмон бо сафари корӣ ва бо мақсади иштирок дар чорабиниҳои бахшида ба 20- солагии рӯзи Ваҳдати миллӣ ба шаҳри Ваҳдат ташриф оварда, пас аз пазироии гарму самимӣ, дар вазъияти тантанавӣ як бинои 20 ошёнаи истиқоматиро мавриди истифода қарор дод.
Бино ба иттилои хадамоти матбуоти сарвари давлат, пас аз ба истифода додани бинои 20 ошёнаи истиқоматӣ, бо буридани лентаи рамзӣ бинои шуъбаи Вазорати корҳои дохилӣ дар шаҳри Ваҳдатро мавриди баҳрабардорӣ қарор дод.
Дар деҳаи Шаҳдбори Ҷамоати деҳоти Раҷаб Исмоилов Президенти мамлакат бо вазъи истифодабарии заминҳои президентӣ шинос шуда, аз намоиши маҳсулоти кишоварзӣ дидан намуда, аз намоиши дастовардҳои хоҷагидорони шаҳри Ваҳдат боздид намуд.
Дар доираи сафари корӣ Эмомалӣ Раҳмон дар деҳаи Зарнисори шаҳри Ваҳдат корхонаи хурди истеҳсолӣ ва нуқтаи таъмири нақлиётро мавриди баҳрабардорӣ қарор дод.
Ҳамчунин Сарвари давлат дар расми мавриди баҳрабардорӣ қарор додани бинои наву замонавии Муассисаи таҳсилоти миёнаи умумии № 71 иштирок намуд.
Бегоҳии рӯз Президенти Тоҷикистон, Эмомалӣ Раҳмон дар маросими кушодашавии сутунпояи Парчами давлатии Тоҷикистон ширкат варзид.
Зимни суханронӣ дар дар варзишгоҳи навбунёди шаҳри Ваҳдат Президенти мамлакат таъкид дошт, ки сулҳи тоҷикон таҷассуми олии майлу иродаи мардуми сулҳпарвари мо, яъне хизмати таърихии халқи қаҳрамони тоҷик мебошад.
«Ваҳдати миллии тоҷикон ганҷи бебаҳоест, ки бо ранҷу машаққати зиёд ва гузашта аз он, дар натиҷаи ҷонбозиву қурбониҳои ҳазорон нафар фарзандони фидоии миллат ба даст омадааст, – гуфт Эмомалӣ Раҳмон. – Аз ин рӯ, мо вазифадорем, ки барои татбиқи ғояҳои ваҳдати миллӣ ва пойдории он талош карда, бо мақсади эҳёву пойдории арзишҳои миллӣ ва тавсеаи тафаккури давлатдории миллиамон, ки асоси пешрафти Тоҷикистони азиз мебошад, сарҷамъона кору фаъолият намоем».
Сарвари давлат ҳамчунин, хотирнишон сохт, ки дар шароити бисёр мураккабу печидаи ҷаҳони муосир мардуми кишвар бояд ҳамеша ҳушёру зирак буда, ба дасисаву фиреби ҳар гуна нерӯҳои манфиатхоҳи бегона фирефта нагардад ва мардум ба номи истиқлолияту озодӣ ва пешрафти ояндаи Ватан муттаҳиду сарҷамъ бошад.
«Ман бо халқи сарбаланд ва бунёдкори Тоҷикистон ифтихор менамоям ва эътимоди комил дорам, ки бо дастгирии мардуми соҳибмаърифатамон мо ҳама гуна мушкилоти рӯзгорамонро бартараф мекунем, нияту нақшаҳои неки оғозкардаамонро бо заҳмати аҳлонаву содиқона амалӣ мегардонем, таҳкими пояҳои давлатдории миллӣ ва пешрафти кишвари соҳибистиқлоламонро таъмин менамоем», – қайд кард Эмомалӣ Раҳмон.
