Вазорати корҳои дохилии Тоҷикистон кормандони милитсияро, ки дар бораашон сайёҳи турк ҳикоят кардааст, ошкор намуда, онҳоро ҷазо дод.
Бино ба маълумоти дафтари матбуоти ВКД Тоҷикистон, Вазорат мақолаи дар шабакаи интернет таҳти унвони «Ягон пулис мисли Тоҷикистон аз паси ришва нест»-ро, ки аз ҷониби аксбардор ва сайёҳи турк Меҳмет Генҷ нашр шуда буд, мавриди баррасӣ қарор додааст.
Гуфта мешавад, зимни санҷиши хизматӣ муайян карда шуд, ки баъзе кормандони ШБДА РВКД дар шаҳри Душанбе, ШБДА дар Қисми минтақавии РВКД дар вилояти Хатлон оид ба гурӯҳи ноҳияҳои Кӯлоб, шуъбачаҳои БДА мақомоти корҳои дохилӣ дар ш.Кӯлоб, ноҳияҳои Ш.Шоҳин ва Дарвоз ба камбудиҳо ва қонуншиканӣ роҳ додаанд.
Зимнан зикр мегардад, ки ҷиҳати бартараф намудани камбудиҳои ҷойдошта тадбирҳои мушаххас андешида шуда, бо Фармони Вазири корҳои дохилии Ҷумҳурии Тоҷикистон аз 28-уми августи соли 2017 ба 25 нафар кормандони мақомоти корҳои дохилӣ ҷазоҳои интизомӣ татбиқ карда шуд.
Қобили зикр аст, ки чанд рӯз пеш Вазорати корҳои дохилии Тоҷикистон дар пайи нашри мавод дар сомонаи Радиои Озодӣ дар бораи аз ҷониби кормандони милитсия тамаъ кардани пул аз сайёҳи олмонӣ дар назди муҷассамаи Исмоили Сомонӣ санҷиш оғоз кард.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
