Зимни мулоқоти раиси вилояти Хатлон Давлатшо Гулмаҳмадзода бо намояндаи сафорати Япония дар Тоҷикистон Тотомохиро Накагаки раиси вилоят ба сафорати ин кишвар пешниҳод кард, ки масъалаи роҳандозии муносибатҳо миёни шаҳри Қӯрғонтеппа ва яке аз шаҳрҳои Япония дар шакли «бародаршаҳрҳо» баррасӣ шавад.
Тавре аз ҳукумати вилояти Хатлон иттилоъ доданд, Гулмаҳмадзода ба сафорати Япония барои кумаки доимӣ ба соҳаҳои маорифу тандурустӣ, беҳтар намудани ҳолати заминҳо, сохтмони роҳҳои мошингард ва таъминот бо об миннатдорӣ изҳор кард.
Дар ҷараёни мулоқот ҷонибҳо ҳамчунин ба масъалаи таъмини бемористони касалиҳои сироятии ноҳияи Данғара ва дигар муассисаҳои тандурустии вилоят бо таҷҳизоти тиббӣ таваҷҷуҳ зоҳир карда, Гулмаҳмадзода аз сафорат барои Театри ба номи Ато Муҳаммадҷонови шаҳри Қӯрғонтеппа кумаки техникӣ дархост намуд.
Дар навбати худ, Тотомохиро Накагаки ба раиси вилоят итминон дод, ки ҳамаи пешниҳодҳои ӯро баррасӣ ва баҳри тақвияти ҳамкориҳои дуҷониба ҳамаҷониба кӯшиш ба харҷ медиҳад.
