Бо мақсади дастгирӣ ва рушди фаъолияти соҳибкории занони ҳунарманд ва эҷодкор бо қарори раиси шаҳри Хуҷанд Маъруф Муҳаммадзода 40 гранти Раиси шаҳр таъсис дода шуд.
Бино ба маълумоти дафтари матбуоти раиси шаҳри Хуҷанд, аз ҷумла: 5 грант дар ҳаҷми 8 ҳазор сомонӣ; 10 грант дар ҳаҷми 5 ҳазор сомонӣ ва 25 грант дар ҳаҷми 3 ҳазор сомонӣ таъсис дода шуд, ки дар маҷмӯъ 165 ҳазор сомониро ташкил медиҳад.
Мутобиқи ин қарор шуъбаи кор бо занон ва оила, бахшҳои сармоягузорӣ ва идораи амволи давлатӣ, ҷавонон ва варзиши мақомоти иҷроияи ҳокимияти давлатии шаҳр ва дигар сохторҳои марбута муваззаф гардидаанд, ки ҷиҳати дар сатҳи зарурӣ ба роҳ мондани чорабиниҳои ташкиливу ҳуқуқӣ, техникӣ, иттилоотӣ ва тарѓиботию ташвиқотии грантҳои Раиси шаҳр оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2018 тадбирҳои зарурӣ андешанд.
Гуфта мешавад, ин иқдом ҳамчунин баҳри бо ҷойи кор таъмин намудани занону духтарон, дастгирии рушди ҳунарҳои дастӣ ва меҳнати хонагӣ (бофандагӣ, дўзандагӣ, армуғонсозӣ, кулолгарӣ, чўбкорӣ, ресандагӣ, читгарӣ, рассомӣ ва дигар намудҳои ҳунарҳои мардумӣ) дар доираи «Соли 2018-соли рушди сайёҳӣ ва ҳунарҳои мардумӣ» амалӣ карда мешавад.
Зимнан зикр мегардад, ки маблағи гранти Раиси шаҳр барои занони ҳунарманд соли гузашта 65 ҳазор сомониро ташкил медод ва имсол беш аз 100 ҳазор сомонӣ афзудааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
