Тибқи қарори раиси вилояти Суғд Раҷаббой Аҳмадзода, бо мақсади ҳифзи иҷтимоии иштирокчиёну маъюбони Ҷанги Бузурги Ватанӣ (ҶБВ) ва ба муносибати 73-солагии Рӯзи Ғалаба дар ҶБВ ба ҳар кадоме аз иштирокчиёну маъюбони ҶБВ ва ҳамсарони бесаробонмондаи ҷанговарони дар ин ҷанг ҳалокгардидае, ки нафақаи бесаробонӣ мегиранд, ба маблағи 1 ҳазору 500 сомонӣ кӯмакпулии яквақта расонида мешавад.
Бино ба иттилои хадамоти матбуоти раиси вилоят, мувофиқи ин қарор ҳамзамон ба шахсоне, ки дар давраи ҶБВ солҳои 1941 – 1945 дар хизмати ҳарбӣ буданд ва на кам аз 6 моҳ дар ақибгоҳ кор кардаанд, инчунин ба шахсоне, ки барои хизмати ҳарбии бенуқсон ва меҳнати фидокорона дар ақибгоҳ дар ҶБВ бо яке аз медалҳои «Барои Ғалаба бар Германия дар ҶБВ солҳои 1941 – 1945», «Барои Ғалаба бар Япония» ва «Барои меҳнати шоён дар солҳои ҶБВ солҳои 1941 – 1945» сарфароз гардидаанд, ба маблағи 1 ҳазору 200 сомонӣ кӯмакпулии яквақта расонида мешавад.
Дар остона ва рӯзҳои ҷашни Рӯзи ғалаба ба собиқадорони ҷангу меҳнат бепул хизматрасонии тиббӣ расонида шуда, дар доираи чорабиниҳои ҷашнӣ Ҳафтаи хотира, вохӯриҳо бо собиқадорони ҷанг ва аҳли оилаи дар ҷабҳа ҳалокушудагон ва дигар чорабиниҳо баргузор мешавад.
Тавре ба «Азия-Плюс» муовини раиси Шӯрои собиқадорони ҷанг ва меҳнати вилояти Суғд Шавкат Алиев хабар дод, айни замон дар минтақаи шимоли кишвар 101 нафар собиқадорони ҶБВ, 467 нафар коргарони ақибгоҳ ва 4 оилаи ҷанговарони дар майдони набард халокшуда зиндагӣ доранд.
Ду собиқадори ҶБВ – Остон Саидов аз ноҳияи Айнӣ ва Маҳмудалӣ Бобоев аз ноҳияи Ашт моҳи феврали соли равон 100-солагиашонро ҷашн гирифтанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
