Журналист Аминҷон Гулмуродзода, собиқ корманди Маркази тадқиқоти журанлистии Тоҷикистонро суди ноҳияи Исмоили Сомонӣ барои тақаллуби ҳуҷҷатҳо ба ду соли зиндон маҳкум карда буд.
Суд журанлистро бо он айбдор карда буд, ки ӯ замони дар шаҳрвнадии Ӯзбекистон қарор доштанаш соли 1989 бо кумаки падараш шаҳодатномаи қалбакӣ дар бораи таваллуд гирифта, бар асоси он шиносномаву диплом гирифтааст ва ақди ниокҳ баста, ба кор даромадааст.
Моҳи августи соли 2016 ӯ бидуни ягон ҳуҷчати тасдиқкунандаи шахсият ба озодӣ баромад. Ӯро пурра аз шаҳрвандии Тоҷикистон ва ҳама гуна ҳуҷҷатҳо маҳрум карданд.
Тавре ба “Азия-Плюс” Гулмуродзода гуфт, баъди ба озодӣ баромадан ӯ ба шуъбаи шиносномадиҳии ВКД Тоҷикистон рафта, вале дар он ҷо додани шиносномаро ба ӯ рад карда, ҳамчунин ҳама гуна роҳу воситаҳои барқарор кардани шаҳрвандии ӯро ғайримкон донистаанд.
Моҳи сентябри соли 2016 ӯ дар бораи барқарор кардани шаҳрвандиаш ба президент нома нпвишта, аз дастгоҳи президент номаро боз ба мизи шиносномадиҳии ҷумҳуриявӣ фиристодаанд.
“Дар шуъбаи раводид ва бақайдгирӣ аз ман дархост намуданд, ки баёнот нависам. Ман дар ҳашт саҳифа тамоми ҷузъиёти вазъро шарҳ додам. Дар номаи ҷавобии онҳо зикр гардида буд, ки танҳо баъди қабули лоиҳаи қонун “Дар бораи авфи шахсони бешаҳрвандӣ ва шаҳрвандони хориҷӣ, ки ғайриқонунӣ дар қаламрави ҷумҳурӣ қарор доранд”, ман метавонам шаҳрвандиамро барқарор созам. Ҳанӯз моҳи ноябри соли 2016 лоиҳаи қонуни зикршуда мавриди баррасии мақомоти дахлдор қарор дошт, лекин то ҳол қабул нашудааст”, – мегӯяд Гулмуродзода.
Айни замон Гулмуродзода танҳо дар раёсати идоракунии манзил дар маҳалли зист ба қайд гузошта шудааст.
Дар ҳамин ҳол, дар барқарор кардани шаҳрвандӣ собиқ роҳбари ҳаракати “Муҳоҷирони меҳнатии тоҷик” Каромат Шарипов низ талош дорад, вале шаҳрвандии Русияро. Ӯ аз болои ВКД Тоҷикистон даъво дошта, ин мақомотро ба пешниҳоди маълумоти бардурӯғ ба Русия дар бораи шаҳрвандиаш айбдор мекунад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
