Шурӯъ аз 27 июн ҳаракати воситаҳои нақлиёт дар хиёбони марказии пойтахт – Рӯдакӣ қатъ шуд. Ҳаракати нақлиёт тариқи қисмате аз роҳи хиёбон – аз Донишгоҳи аграрӣ то Донишгоҳи омӯзгории Тоҷикистон баста шудааст.
Бино ба маълумоти дафтари матбуоти мақомоти шаҳрдории Душанбе, ҳаракати воситаҳои нақлиёти мусофирбари хатсайрҳои автобусии №-№1, 3А ва №18 тариқи кӯчаҳои ҳамшафат (хиёбони Рӯдакӣ бо баромад бо кӯчаҳои Л.Шералӣ, М.Турсунзода, Карамов ва У.Хайём бо хиёбони Рӯдакӣ боқимонда бетағйир) ба роҳ монда шуда, фаъолияти троллейбуси хатсайри №1 муваққатан қатъ мегардад.
Қаблан зикр гардида буд, ки роҳ аз VIP-толори Фурудгоҳи байнулмилалии Душанбе тариқи тамоми маркази пойтахт то Донишгоҳи аграрӣ давра ба давра барои таъмир баста мешавад.
Ғайр аз ин, мақомоти шаҳрдорӣ ба таъмиру навсозии намо (фасад)-и чанде аз биноҳо дар маркази шаҳр, ки ҳанӯз замони шӯравӣ бунёд шудаанд, шурӯъ намудааст.
Мақомоти шаҳрдорӣ бо ҳамин васила маркази пойтахтро барои баргузории нишасти сарони кишварҳои узви Иттиҳоди Давлатҳои Мустақил (ИДМ), ки охири моҳи сентябр дар пойтахти Тоҷикистон доир мегардад, омода мекунад.
Ғайр аз ин, нимаи дуюми соли равон дар Душанбе нишасти сарвазирони кишварҳои узви Созмони ҳамкории Шанхай (СҲШ) низ баргузор мешавад.
Дар бораи чӣ қадар ҷудо шудани маблағ аз буҷети шаҳр барои анҷоми корҳои зикршудаи таъмиру навсозӣ аз мақомоти шаҳрдорӣ то ҳол маълумот надоданд. Тибқи ҳисобу китоби мо – наздики 3 млн. доллар.
Бо мутахаасисони соҳаи роҳсозӣ машварат намуда, мо тасмим гирифтем, ки ин маблағро худамон ҳисобу китоб кунем.
Масофаи роҳи шашхата аз фурудгоҳ то Донишгоҳи аграрӣ каме бештар аз 8 километр аст.
Маблағи таъмири асосии 1 километри роҳ ба ҳисоби миёна 1 млн. 300 ҳазор доллар (11 млн. 472,5 ҳазор сомонӣ) ва мутаносибан маблағи таъмири асосии ин роҳ 10 млн. 400 ҳазор доллар (91 млн. 780 ҳазор сомонӣ)-ро ташкил медиҳад.
Агар таъмири хурд (ҷорӣ) гузаронида шавад, барои 1 километр роҳ ба ҳисоби миёна 400 ҳазор доллар (3 млн. 530 ҳазор сомонӣ) ва барои 8 километр наздики 3 млн. 200 ҳазор доллар (28 млн. 240 ҳазор сомонӣ) маблағ лозим аст.
Зимни анҷоми корҳои таъмири асосӣ ё ҷорӣ вобаста ба нархи масолеҳи сохтмон ва хизматрасонӣ ин маблағ метавонад кам ё зиёд шавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
