Вазорати тандурустӣ ва ҳифзи иҷтимоии аҳолии Тоҷикистон ташаббускори ифтитоҳи ҳуҷраҳои тавонбахшии тиббию иҷтимоӣ барои ҷабрдидагони зӯроварӣ дар оила дар саросари кишвар шуд.
Бино ба иттилои дафтари матбуоти Вазорат, ҳуҷраҳо дар шуъбаҳои таваллудхонаи беморхонаҳои марказии шаҳру навоҳӣ ба фаъолият мепардозанд.
Ин иқдом дар доираи амалисозии меъёрҳои қонун “Дар бораи пешгирии зӯроварӣ дар оила” ва Барномаи давлатӣ оид ба пешгирии зӯроварӣ дар оила дар Тоҷикистон барои солҳои 2014-2023 сурат мегирад.
Гуфта мешавад, то охири моҳи ноябр дар назди шуъбаҳои таваллуди Беморхонаҳои марказии ноҳияҳои Панҷ, Шаҳритӯс ва Фархор ҳуҷраҳои тавонбахшии тиббию иҷтимоӣ барои ҷабрдидагони зӯроварӣ дар оила ташкил шудааст.
Инчунин дар назди Муассисаи давлатии “Маҷмааи тандурустии “Истиқлол”-и шаҳри Душанбе “Ҳуҷраҳои тиббию иҷтимоии офиятии занони аз зӯроварӣ дар оила ранҷкашида” таъсис дода шуда, бо кӯмаки техникии Филиали GОPА мбХ дар Ҷумҳурии Тоҷикистон/Лоиҳаи пешгирии зӯроварии хонаводагӣ (PDV) бо таҷҳизоти зарурӣ муҷаҳҳаз ва ба фаъолият шурӯъ намуданд.
Дар ин ҳуҷраҳо кормандони ҳайати тиббии бемористонҳо кор мекунанд, ки дар масъалаи чӣ гуна расонидани кумак ба чабрдидагон аз зӯроварӣ дар оила бо давраҳои омӯзишӣ фаро гирифта шудаанд.
Айни замон дар Тоҷикистон ҳамчунин телефони боварии 1313 ва маркази захиравӣ оид ба пешгирии хушунат дар оила низ амал мекунад. Ин лоиҳа аз ҷониби Иттиҳоди Аврупо маблағгузорӣ шудааст.
Дар маркази захиравӣ барои мусоидат ба ҷамъоварӣ ва таҳлили маълумоти муфассал да бораи ҳодисаҳои зӯроварӣ дар оила пойгоҳи маълумот ташкил мешавад. Барои сарвиақт ҷамъоварии маълумоти дақиқи оморӣ ва коркарди он замимаи электронӣ таҳия шудааст. Муроҷиатҳои телефонӣ низ дар пойгоҳ қайд мешаванд.
Моҳи октябри соли равон созмони байнулмилалии ҳомии ҳуқуқи Human Rights Watch (HRW) ба ҳукумати Тоҷикистон тавсия дод, ки барои зӯроварӣ дар оила ҷавобгарии ҷиноятӣ ҷорӣ кунад.
Маҳз зӯроварӣ дар оила аз ҷониби шавҳар ва наздиконӣ ӯ яке аз сабаҳои даст ба худкушӣ задани занон дар Тоҷикистон маҳсуб меёбад.
Бино ба маълумоти Кумитаи кор бо занон ва оилаи назди ҳукумати Тоҷикистон, 497 нафар занону духтарон соли 2017 дар Тоҷикистон даст ба худкушӣ заданд. Соли 2016 ин нишондиҳанда 596 нафарро ташкил медод.
Хабарҳои моро дар Viber пайгирӣ намоед, ба шабакаи мо бо суроғаи https://viber.com/asia-plus ҳамроҳ шавед.
Хабаргузории Asia-Plus-ро манбаи асосии иттилооти худ дар Google Новости бигардон, ба шабака бо суроғаи зерин обуна шав.
