Чанде аз сокинони Тоҷикистон мегӯянд, бонкҳо хизматрасониҳоро ба мизоҷон бе шиносномаҳои пластикӣ рад мекунанд. Аммо дар бонкҳо ҷорӣ шудани чунин тартиботро рад карда, зикр менамоянд, ки бо пешниҳоди шиносномаҳои намунаи кӯҳна низ мизоҷон метавонанд аз ҳама гуна хизматрасониҳо истифода кунанд.
Маводи гузоштаи корбар Далер Абдуллоев дар шабакаи Facebook доир ба дар “Амонатбонк” ба ӯ надодани пули фиристода бо шиносномаи коғазӣ сарусадоҳои зиёдеро ба бор овард.
“Расидем бачаҳо. Имрӯз ман пулро бо шиносномаи кӯҳна гирифта натавонистам. Ин маҷбуркунӣ ба гирифтани шиносномаи пластикӣ аст?”, – навиштааст Абдуллоев дар шабакаи иҷтимоӣ.
Зери ин мавод баҳси пурҷӯшу хурӯш сурат гирифт: аксари корбарони бағазабомада намефаҳманд, ки ин барои бонк чӣ лозим аст, зеро чизи аз ҳама асосӣ барои ташкилотҳои қарзӣ – эътимод ҳосил кардан ба шахсияти мизоҷ ва пул кор кардан аз ҳисоби хизматрасонӣ аст.
Аксарият аз эҳтимол дур намедонанд, ки агар дар ҳамаи нуқтаҳое, ки пешниҳоди шиноснома талаб мешавад, қабули шиносномаҳои коғазӣ рад шавад, пас ба ин васила ҳар як шаҳрвандро ба гирифтани ID-шиноснома уҳдадор месозанд.
“Амонатбонк” рад мекунад
Дар “Амонатбонк” пешниҳоди чунин шартҳоро ба мизоҷон аз ҷониби кормандони бонк қотеъона рад карданд.
“Намефаҳмем, ки чунин маълумоти нодурусту носаҳеҳ ва беэътимод чӣ гуна паҳн мешавад”, – гуфтанд ба “Азия-Плюс” дар бонк.
Зикр шуд, ки ҳамаи хизматгузориҳои “Амонатбонк” имрӯз бо шиносномаи коғазӣ бидуни ягон маҳдудият анҷом дода мешаванд. Дар ин бонк ба мизоҷон тавсия доданд, ки дар сурати пайдо шудани ягон мушкилоте дар ин маврид ба раҳбарияти бонк муроҷиат кунанд.
Дар Бонки миллии Тоҷикистон ба “Азия-Плюс” иттилоъ доданд, ки дар ин робита ба бонкҳо ягон дастуре дода нашудааст ва хизматрасониҳои бонкӣ бояд бо шиносномаҳои намунаи амалкунанда дастрас бошанд.
Ёдрас мекунем, ки нимаи моҳи феврали соли равон дар бораи бақайдгирии сим-кортҳои телефонҳои мобилӣ бо шиносномаи намунаи нав (ID-шиноснома) дар Тоҷикистон маълумот дода шуд.
Қоидаҳои нав дар тағйирот ба қарори ҳукумат «Дар бораи Тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он» зикр шудаанд. Мувофиқи қоидаҳои нав, агар шумо шиносномаи намунаи кӯҳна дошта бошед, онро бояд бо шиносномаи нави пластикӣ иваз намуда, сипас рақами телефони худро бо он ба қайд гузоред.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
