Дар муқоиса бо ҳамин давраи соли гузашта нимаи аввали сол занон дар вилояти Суғд 219 қонуншиканӣ зиёдтар кардаанд.
Роҳбари Раёсати кор бо занон ва оилаи ҳукумати вилояти Суғд Нигора Ғаффорзода зимни нишасти хабарӣ дар ин робита изҳор намуд, ки давоми шаш моҳ аз ҷониби занон 556 ҷиноят содир шуда, афзоиши сатҳи ҷинояткорӣ байни занон дар шаҳрҳои Хуҷанд, Бӯстон, Конибодом ва ноҳияи Ашт ба қайд гирифта шудааст.
“Дар шаҳри Хуҷанд аз ҷониби занон 142 ҷиноят содир карда шудааст, ки нисбат ба ҳамин давраи соли гузашта 79 ҳолат бештар аст”, – қайд кард ӯ.
Бино ба гуфтаи ӯ, дар баробари афзоиши ҷинояткорӣ миёни занон, зиёдшавии ҳолатҳои худкшӣ низ байни занон ба қайд гирифта шуда, ба сурати умум давоми ним сол 62 ҳодисаи худкушӣ рух додааст, ки дар муқоиса бо ним соли гузашта 11 ҳолат зиёдтар аст.
“Мутаассифона, дар 12 ҳолат духтарони ноболиғ даст ба худкушӣ заданд, – изҳор дошт Нигора Ғаффорзода.
Роҳбари Раёсати кор бо занон ва оилаи вилояти миёни сабабҳои аслии даст ба худкушӣ задани занонро зӯроварӣ дар оила номбар карда, изҳор намуд, ки дар мубориза бо ин падидаи манфӣ фаъолияти Кумитаи дахлдор дар ин самт кофӣ набуда, дар ин маврид дастаҷамъона фаъолият кардан лозим аст.
“Дар сохторҳои кумитаи кор бо занон ва оилаи шаҳру ноҳияҳо ҳамагӣ ду нафарӣ кор мекунанд, ки табиист, ба ҳалли тамоми мушкилоти маҷудаи занону оилаҳо қодир нестанд. Дар ин самт талоши ҳамаи аҳли ҷомеа зарур аст, ба ин масъала ҷомеа набояд бетараф бошад”, – илова намуд Ғаффорзода.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
