Ба идораи “Азия-Плюс” яке аз занони корманди поликлиникаи пойтахт муроҷиат карда, хабар дод, ки роҳбарият онҳоро ба бозори Корвон барои гирифтани озмоиши хун аз фурӯшандагон барои ташхиси Вируси норасоии масунияти одам (ВНМО, ВИЧ) фиристодааст.
Барои шарҳи масъала ба Вазорати тандурустӣ ва ҳифзи иҷтимоии аҳолии ҶТ муроҷиат кардем.
“Маълумоти мазкур на он қадр саҳеҳ аст, – хабар доданд ба “Азия-Плюс” аз маркази матбуоти Вазорати тандурустӣ. – Аслан, дар доираи пешгирӣ ва мубориза бо Бемории пазируфтаи норасоии масуният (БПНМ, СПИД) идораи мо тасмим гирифт, ки байни аҳолии кишвар корҳои фаҳмондадиҳӣ гузаронад. Тавре маълум аст, бозори “Корвон” макони хеле серодам ва муҳим аст, ки дар он ҷо ҳамаи чораҳои бехатарии сироят аз ин беморӣ бояд риоя шаванд”.
Ба гуфтаи намояндаи Вазорати тандурустӣ, гурӯҳи кормандони тиббӣ бо ҳамин мақсад ба бозор фиристода шуданд.
“Кормандони мо дар он ҷо зимни суҳбатҳо бо фурӯшандагон дар бораи муҳим будани ташхис ба ВНМО/БПНМ ва огоҳӣ доштани ҳар як нафар аз ин беморӣ маълумот медиҳанд. Чунин корҳои пешгирӣ хеле муҳиманд”, – хабар доданд дар маркази матбуоти Вазорати тандурустӣ.
Дар Тоҷикистон 68 маркази БПНМ, аз ҷумла, як маркази ҷумҳуриявӣ, як минтақавӣ ва 58 маркази ноҳиявӣ фаъолият доранд.
Мувофиқи Кодекси тандурустии ҶТ, маводи доруворӣ ба сироятёфтагони ВНМО комилан бепул дода мешавад. Кӯдакони синни то 18-сола ҳар моҳ ҳудуди 400-500 сомонӣ кумакпулӣ мегиранд. Кӯдакон аз замони таваллуд то 1-2-солагӣ бо омехтаҳои ширӣ таъмин мешаванд.
“Занон бепул муолиҷа мегиранд”, – гуфтанд дар Вазорати тандурустии Тоҷикистон.
Шумори шахсони расман муайяншудаи гирифтори ВНМО Тоҷикистон айни замон 10,7 ҳазор нафар аст, ки 7 ҳазор нафари онҳо мардон мебошанд.
Бино ба маълумоти Вазорати тандурустии Тоҷикистон, 54,6% ё худ наздики 5,9 ҳазор нафар зимни алоқаи ҷинсӣ ва 4% бо роҳи сироятёбии аз модар ба кӯдак гирифтори ВНМО шудаанд.
Соли гузашта дар ҷумҳурӣ 1,4 ҳазор ҳолати сирояти ВНМО ба қайд гирифта шуда, 48 ҳолати он дар ҷараёни гирифтани шаҳодатнома барои ақди никоҳ муайян гардидааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
