Дар Қонуни ҶТ “Дар бораи Буҷети давлатии Тоҷикистон барои соли 2020”, ки охири моҳи ноябр аз ҷониби раисҷумҳур Эмомалӣ Раҳмон тасдиқ гардид, зикр шудааст, ки аз 1-уми январи соли 2020 маблағи нишондиҳанда барои ҳисобҳо 58 сомониро ташкил медиҳад.
Қаблан як манбаи “Азия-Плюс” дар сохтори иқтисодии ҳукумати Тоҷикистон итминон дода буд, ки “ҳаҷми нишондиҳанда барои ҳисобҳо дар соли 2020 низ чун соли ҷорӣ 55 сомонӣ боқӣ хоҳад монд”.
Зимни баррасии лоиҳаи буҷети давлатӣ дар палатаи поёнии парлумони Тоҷикистон вакилони мардумӣ ва намояндагони ҳукумат дар бораи болоравии ҳаҷми боҷу ҷаримаҳо дар соли оянда ҳарфе нагуфта буданд.
Нишондиҳанда барои ҳисобҳо дар Тоҷикистон аз 1-уми июли соли 2008 мафҳуми “ҳадди ақалли музди меҳнат”-ро иваз карда, барои ҳисоби андоз, ҷарима, боҷ ва дигар пардохтҳои ҳатмӣ, инчунин кумакпулиҳои иҷтимоӣ ва иловапулӣ истифода мешавад. Он ҳар сол бо назардошти сатҳи таваррум муқаррар мегардад.
Соли 2019 дар кишвар ҳаҷми боҷ ва ҷаримаҳо 10% афзуд. Ин аз сабаби афзоиши нишондиҳанда барои ҳисобҳо аз 50 то 55 сомонӣ сурат пазируфт.
Ёдрас мекунем, ки аз 1-уми январи соли 2015 нишондиҳанда барои ҳисобҳо дар ҳаҷми 40 сомонӣ, аз 1-уми январи соли 2017 дар ҳаҷми 50 сомонӣ ва аз 1-уми январи соли 2019 дар ҳаҷми 55 сомонӣ муқаррар шуда буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
