Баробарӣ байни занону мардон яке аз арзишҳои аввалиндараҷаи Иттиҳоди Аврупо мебошад, ки дар санадҳои стратегии он дарҷ ёфтааст. Аз ин рӯ, Иттиҳоди Аврупо ба нақши занону духтарон дар рушди устувор, иштироки баробар ва пешвоии онҳо дар ҳамаи соҳаҳои ҳаёт таваҷҷуҳи ҷиддӣ зоҳир мекунад.
Иттиҳоди Аврупо дар ҳамдастӣ бо СММ амалисозии ташаббуси бузурги глобалиро таҳти унвони Spotlight (Нурафкан) оғоз мекунад, ки аз байн бурдани ҳама гуна шаклҳои хушунат нисбат ба занон ва духтарон дар саросари дунёро пешбинӣ мекунад.
Тоҷикистон низ барои амалисозии ин ташаббус дар солҳои 2020-2022 миёни кишварҳои қораи Осиё дар баробари Қирғизистону Афғонистон интихоб шуд.
Барои татбиқи Барномаи Spotlight дар Тоҷикистон 5 млн. евро ҷудо мешавад. Айни замон таҳияи Барномаи кишварӣ ҷараён дорад, ки дар он мақсаду вазифаҳои асосӣ, фаъолият, натиҷаҳо ва сохтори идоракунии ташаббус муайян мегардад.
Дар назар аст, ки ташаббуси 3-сола ба такмили қонунҳову сиёсат дар мавриди хушунат аз рӯйи ҷинс; таҳкими имконоти муассисаҳои давлатӣ; фароҳам овардани шароити мусоид барои занон бо меъёрҳои боэҳтиромонаи иҷтимоӣ, ки аз қолабҳо, рафтори зараровар, поймолкунии ҳуқуқ ва зӯроварӣ озоданд; беҳбуди сифати хизматрасониҳо барои ҷабрдидагон аз зӯроварӣ; беҳбуди низоми ҷамъоварӣ ва таҳлили маълумот; дастгирии ҷомеаи шаҳрвнадӣ дар пешгирӣ ва вокуниш ба хушунат дар нисбати занону духтарон мусоидат мекунад.
Дар доираи Барномаи аврупоӣ дар соҳаи демократия ва ҳуқуқи инсон аввали соли 2020 татбиқи боз як лоиҳа – “Дастгирӣ ва таҳкими Марказҳои захиравии занон дар Тоҷикистон” оғоз мешавад, ки ба дастгирии занони осебпазир дар минтақаҳо равона шудааст.
Лоиҳаи 2-сола аз ҷониби Дафтари кории барномавии САҲА амалӣ мегардад, ки қаблан тӯли солҳои зиёд шабакаи васеи Марказҳои захиравӣ барои занонро дар Суғду Хатлон ва Рашту ВМКБ дастгирӣ карда буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
