Дар бозори навбунёди “Суғдиён”, воқеъ дар маҳаллаи 3-юми шаҳри Хуҷанд фурӯши маҳсулоти кишоварзӣ аз дасти аввал бе миёнаравону ҳаннотон роҳандозӣ шудааст.
Дар он картошка, сабзӣ, пиёз, шалғам, карам ва ғайра 30-40% арзонтар аз бозорҳои дигари шаҳр пешниҳоди харидорон мешавад.
Нина Ушакова, сокини шаҳри Хуҷанд гуфт: “Нархи маҳсулоти ин ҷо нисбатан арзон аст. Дирӯз барои харид баромада будам, 1 кг картошка дар бозори дигар то 4,5 сомонӣ буд, дар мағозаҳо низ ҳамин хел нарх. Имрӯз дар ин ҷо ман ба 3,5 сомонӣ харидам ”.
Роҳбари бозори “Суғдиён” Абдураҳим Абдуллоев иброз дошт, ки барои фурӯшандагон як қатор имтиёзҳо, аз ҷумла, меҳмонхона, истгоҳ ва иҷораи ройгон пешбинӣ шудааст.
“Дар ин бозор қариб 2000 нуқтаи савдо мавҷуд буда, масоҳати умумии он 9 гектар мебошад. Шароити фаъолият ба таври ройгон муҳайё мешавад. Дар ин ҷо барои 1500 мошин таваққуфгоҳи нақлиётӣ ҳаст. Имконоти инфрасохторӣ кори яклухтфурӯшони маҳсулоти кишоварзиро осон мекунад”, – афзуд роҳбари бозор.
Зимнан ба роҳбарони хоҷагиҳои деҳқонӣ ва кишоварзони вилоят имкон дода мешавад, ки маҳсулоташонро бо истифода аз имтиёзҳои маъмурияти бозор ба харидорон бо нархи дастрас пешниҳод кунанд.
Ба гуфтаи Абдуллоев, рӯзҳои наздик фурӯши орд, равған ва биринҷ низ ташкил карда мешавад. Дар ин хусус бо роҳбарони корхонаҳои истеҳсоли орду равған ва масъулини дахлдор мувофиқа шудааст.
Дар вақти боздиди мо аз ин бозор деҳқонон аз шаҳру навоҳии Истаравшан, Деваштич, Спитамен, Ҷаббор Расулов ва Мастчоҳ маҳсулоти худро савдо мекарданд.
Баҳриддин Аҳмадов аз ноҳияи Деваштич гуфт: “Аз ин пеш маҳсулотамонро дар кӯчаву хиёбонҳои шаҳр мефурӯхтем ва ҳоло бароямон дар ин ҷо шароит фароҳам овардаанд. Мо барои дастгирии халқ ба ивази имтиёзҳои бозор маҳсулотро бо нархи арзон фурӯхта истодаем”.
Фурӯшандаи дигари бозор Ғолибҷон Ҳошимов илова кард: “Нархи 1 кг картошка дар ин ҷо 3,5 сомонӣ, сабзӣ 60-70 дирам ва пиёз 2,20 сомонӣ аст. Дар бозорҳои дигар картошка 4-4,5 сомонӣ, сабзӣ то 1 сомонию 20 дирам аст”.
Масъулин бовар доранд, ки бо ташкили чунин бозор арзиши маҳсулоти ниёзи аввалро муътадил нигаҳ дошта, кори дасти ҳаннотонро, ки дар бисёр маврид нархро бе ягон асос боло мебардоранд, аз байн хоҳанд бурд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
