Корҳои сохтмон дар эстакадаи маҳаллаи Қарияи Болои шаҳри Душанбе пурра ба анҷом расида, роҳ барои ифтитоҳ ва истифода омода аст.
Дар ин бора ба “Азия-Плюс” аз Вазорати нақлиёти Тоҷикистон хабар дода, лекин дар бораи сабаби ба таъхир афтодани ифтитоҳи он чизе нагуфтанд.
Дар ҳамин ҳол, дар Вазорати нақлиёт маълумотро дар бораи аз ҷониби Комиссияи давлатии қабул ошкор шудани камбудиву норасоиҳо дар иншоот рад карданд.
“Иншоот барои истифода 100% омода буд, ягон камбудию норасоӣ надорад. Алҳол рӯзи дақиқи ифтитоҳи он маълум нест. Умедворем, ки ба наздикӣ боз мешавад. Ифтитоҳи он ба мо вобаста нест”, – гуфтанд дар Вазорат.
Ба суоли мо “чаро маросими ифтитоҳ мавқуф гузошта мешавад?” дар Вазорати нақлиёт чунин посух доданд: “Санаи дақиқи кушодани ин роҳ ҳеҷ гоҳ расман эълон нашудааст. Вақте ки рӯзаш маълум шуд, он замон расман хабар медиҳем”.
Ҳанӯз моҳи январи соли 2019 зимни нишасти хабарӣ муовини аввали раиси шаҳри Душанбе Маҳмадсаид Зувайдзода изҳор дошта буд, ки сохтмони эстакадаи дуюми сеқабата дар мавзеи буриши хиёбонҳои Исмоили Сомонӣ ва Абӯалӣ ибни Сино пеш аз муҳлат – охири соли 2019 ба итмом мерасад.
Моҳи декабри соли 2019 муовини сарвазир Азим Иброҳим бо ҷараёни корҳо дар иншооти мазкур шинос шуда, дар умум изҳори қаноатмандӣ кард ва гуфт, ки мувофиқи нақша, роҳ то 20-уми марти соли 2020 пурра ба истифода дода мешавад.
Барои равшанӣ андохтан ба масъала ба шаҳрдории Душанбе ҳам муроҷиат кардем, аммо дар он ҷо ба мо чизеро шарҳ надода, боз ба Вазорати нақлиёт муроҷиат карданро тавсия доданд…
Қобили зикр аст, ки муҳлати навбатии маросими мавриди баҳрабардорӣ қарор додани эстакада имрӯз, 25-уми июн эълон гарида буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
