Баста шудани сарҳадҳо ва маҳдудиятҳои ҷоришуда вобаста ба пандемияи коронавирус ба коҳиши ҳаҷми ҳамлу нақли байнулмилалии бор ва мусофирон боис гардид.
“Давоми 6 моҳи соли равон тариқи ҳама гуна навъи нақлиёт дар умум 38790,2 ҳазор тонна бор кашонида шуда, ба 296018,8 ҳазор нафар мусофирон хизматрасонӣ сурат гирифтааст, ки мутаносибан ба 92,2% ва 97% нисбат ба ҳамин давраи соли гузашта баробар аст”, – хабар дод зимни нишасти матбуотӣ вазири нақлиёти Тоҷикистон Худоёр Худоёрзода.
Ба гуфтаи вазир, бар асари пандемияи коронавирус моҳҳои охир ҳаҷми боркашонии байнулмилалӣ ва хизматрасонӣ ба мусофирон ба таври назаррас коҳиш ёфт.
“Зиёни расида аз таъсири пандемия ба боркашонии автомобилӣ 132 млн сомонӣ арзёбӣ шуда, Вазорат баҳри беҳбуди вазъият дар ин самт тадбирҳои дахлдор рӯйи даст мегирад”, – иброз дошт Худоёрзода.
Зикр шуд, ки қаблан боркашонӣ ва мусофиркашонии байнулмилалӣ тариқи 17 постгоҳҳои назоратии сарҳадӣ сурат гиифта, бо мақсади пешгирии паҳншавии коронавирус, айни замон он танҳо тавассути 7 постгоҳ амалӣ мешавад.
Дар сарҳади байни Тоҷикистону Ӯзбекистон 3 постгоҳ, дар марзи Тоҷикистону Қирғизистон – 2 ва дар марзҳои Тоҷикистон бо Афғонистону Чин 1-постгоҳӣ амал мекунанд.
Вазири нақлиёт зикр кард, ки фаъолияти постгоҳи назоратии “Қулма” дар сарҳади байни Тоҷикистону Чин ҳанӯз аввали сол қатъ гардида, аввали моҳи май барқарор шуд, лекин тариқи он танҳо ба боркашонии контейнерӣ иҷоза дода шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
