Зарари расида аз ҷиноятҳои коррупсионӣ дар 11 моҳи соли 2020 дар вилояти Суғд 21 миллион сомонӣ ҳисоб шудааст. То ин замон танҳо 10.8 сомонии он барқарор шудааст.
Раёсати Оҷонсии назорати давлатии молиявӣ ва мубориза бо корупсияи ҶТ дар вилояти Суғд мегӯяд дар ин 11 моҳ дар вилоят 498 ҷинояти марбут ба фасод ошкор шудааст, ки аз ин 177 ададашро ҷиноятҳои вазнин ташкил медиҳад.
Сардори бахши ташкили кор ва назорати ин ниҳод дар вилояти Суғд Суҳроб Муҳаммадӣ ба “Азия-плюс” гуфт, ки аз ҳама бештар кормандони кумитаи заминсозӣ, соҳаи тандурустӣ, маориф, бонк ва мақомоти иҷроияи ҳокимияти давлатӣ даст ба фасод задаанд.
“Дар ин давра ҷиноятҳои копурсионӣ аз ҷониби кормандони мақомоти иҷроияи ҳокимияти давлатӣ 24, соҳаи тандурустӣ 19, Кумитаи заминсозӣ 25, соҳаи маориф 64 ва бонкҳо 47 ошкор шудааст”,- гуфт Суҳроб Муҳаммадӣ
Ҷиноятҳои марбут ба фасодро ин ниҳод бештар дар Хуҷанд 141 маврид, Панҷакент 64, Бобоҷон Ғафуров 50, Шаҳристон 22, Ашт 29, Спитамен 59 ва Истаравшан 22 маврид сабти ном кардааст.
Ин ниҳод дар бархе аз субъектҳои соҳибкорӣ ва ширкату ҷамъиятҳо ҳолатҳои кам ҳисоб намудан ва рӯйпӯшкунии андозҳоро низ ошкор кардааст, ки 16.5 миллион сомонӣ гуфта мешавад. Соли гузашта кам ҳисоб кардани андоз дар ин вилоят 20 миллион сомонӣ буд. Раёсати Оҷонсии мубориза бо фасод дар вилоят мегӯяд ин зарар ба будиҷа комилан барқарор шудааст.
Дар 11 моҳи соли равон аз ҷониби ин ниҳод дар вилоят 90 ҷиноят вобаста ба хариду фурӯши замин ошкор шудааст, ки 57 парвандаи ҷиноӣ оғоз шудааст. Маблағи хисороти расида ҳам 1.4 млн сомониву 273 ҳазор доллари амрикоиро дар бар гирифтааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
