Ширкати ҳавопаймоии «S7»-и Русия аз ҳукумати Тоҷикистон ҷиҳати анҷоми парвозҳои чартерӣ аз Тоҷикистон ба Русия иҷозатнома гирифт.
Тавре сафоратхонаи Русия дар Тоҷикистон хабар медиҳад, ширкат рӯзи 18 декабр аллакай як парвозро бо хатсайри Хуҷанд-Москва иҷро кардааст.
Минбаъд парвозҳо дар як ҳафта як маротиба бо хатсайрҳои зерин ба иҷро расонида мешаванд:
Душанбе – Новосибирск: рӯзҳои панҷшанбе аз 24 декабр;
Хуҷанд – Москва: рӯзҳои панҷшанбе аз 22 декабр;
Хуҷанд – Новосибирск: рӯзҳои сешанбе аз 22 декабр.
Парвозҳои зикршуда барои ба ватан баргардонидани шаҳрвандони Русия, инчунин шахсоне, ки барои ба Русия ворид шудан мувофиқи фармоиши ҳукумати Русия аз 16 март (№ 635-р) асос доранд, пешбинӣ шудааст.
Дар ҳамин ҳол, шаҳрвандоне, ки шаҳрвандии Русияро надоранду бо ин хатсайрҳо парвоз карданианд, бояд ҳатман бо худ маълумотномаи муассисаи тиббӣ (бо забони русӣ) дар бораи мубтало набудан ба коронавирусро аз рӯйи натиҷаҳои тест дошта бошанд, ки он на дертар аз 3 шабонарӯз то расидан ба Русия дода шудааст.
Гуфта мешавад, билетҳо ба хатсайрҳои мазкур тариқи сомонаи расмии «S7» ва намояндагии ширкати ҳавопаймоӣ дар Тоҷикистон фурӯхта мешаванд.
Қобили зикр аст, ки бар асари пандемия алоқаи мунтазами ҳавоӣ байни Тоҷикистону Русия қатъ шуда, ба ивази он аз ҳар ду ҷониб парвозҳои чартерии аз кишвари хориҷӣ ба ватан баргардонидани ҳамватанон роҳандозӣ гардид.
Парвозҳоро аз Русия ба Тоҷикистон ширкати ҳавопаймоии “Сомон Эйр” анҷом дода, парвозҳои чартериро аз Тоҷикистон ба Русия ду ширкати ҳавопаймоии Русия – “ЮТэйр” ва “Уральские авиалинии” аз моҳи ноябр оғоз карданд.
Танҳо дар моҳи декабр анҷоми 146 парвоз аз Русия ба Тоҷикистон ба нақша гирифта шудааст. “Уральские авиалинии” дар як ҳафта аз Тоҷикистон ба Русия 11 парвози чартерӣ иҷро мекунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
