Ба муносибати 76-умин солгарди Рӯзи Ғалаба дар Ҷанги Бузурги Ватанӣ (ҶБВ) аз фонди захиравии сарвари давлат ба ҳар кадоме аз собиқадорони ин ҷанг 10 ҳазор сомонӣ ҷудо шуд, хабар дод ба “Азия-Плюс” як манбаъ аз ҳукумати ҷумҳурӣ.
Ғайр аз ин, президент ба ҳамаи раисони шаҳру навоҳӣ ва вилоят дастур дод, ки аз ҳисоби буҷетҳои маҳаллӣ ба собиқадорони ҶБВ кумаки молиявӣ расонанд.
Тибқи маълумоти Вазорати тандурустии Тоҷикистон, айни замон дар ҷумҳурӣ 94 собиқадори ҷанг зиндагӣ мекунанд.
Ҳамагӣ як моҳ пеш шумори онҳо 102 нафарро ташкил дода, ҷашни Рӯзи Ғалабаи соли гузаштаро 168 нафар собиқадорони ҷанг аз Тоҷикистон таҷлил намуданд.
Дар майдонҳои набарди ҶБВ наздики 300 ҳазор нафар аз Тоҷикистон ҷангидаанд. Аз ин шумор 92 ҳазор ҳалок ва бе ному нишон шуда, ба 65 кас унвони Қаҳрамони Иттиҳоди Шӯравӣ дода шуд, 15 нафар бо ордени “Шараф” ва боз 55 ҳазор кас бо ордену медалҳои дигар мукофотонида шуданд.
Қаблан бо қарори раиси пойтахт Рустами Эмомалӣ, ба 16 собиқадори ҶБВ, ки имруз дар пойтахт зиндагӣ мекунанд, аз фонди захиравии раиси шаҳр 1,5 ҳазор сомонӣ ҷудо гардид.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
