Шӯрои уламои Маркази исломии Тоҷикистон рӯзи Иди Қурбонро дар Тоҷикистон 20-уми июли соли 2021 таъин кард. Дар ин бора Афшин Муқим, сухангӯйи Кумитаи дини Тоҷикистон хабар дод.
Соли гузашта бар асари авҷи бемории коронавирус ва шароити беҳдошти Иди Қурбон дар Тоҷикистон бидуни хондани намози ид ва таҷлили густардаи он баргузор шуда буд.
Шӯрои уламо дар баробари таъини рӯзи Иди Қурбон ҳамчунин имомхатибонро муваззаф кардааст, ки "дар маъвизаҳояшон таваҷҷуҳи мардумро ба масъалаи риояи қоидаҳои беҳдоштӣ, илмомӯзии ҷавонони наврасон ва расонидани кӯмаки моддӣ ба ятимону бепарасторон, пешгирии исрофкориҳо дар рӯзҳои ид ва сарфаю сариштакорӣ ҷалб намуда, худашон намунаи ибрати дигарон бошанд".
Ҳамчунин Шӯрои уламо, масҷидҳои ҷомеи кишварро ба пардохти маблағи ҳаққи аъзогӣ аз ҳисоби Иди Қурбон ба миқдори 600 сомонӣ муваззаф кардааст.
Имсол дар Маскав хондани намози Иди Қурбон дар масоҷид манъ шуд ва худи ид ба таври маҷозӣ таҷлил мешавад.
Ҳамчунин имсол дар шароити ногувори беҳдоштӣ барои бори дувум маросими Ҳаҷҷ ё ба истилоҳ ҳаҷҷи фарзӣ, ки ҳамасола дар арафи Иди Қурбон сурат мегирифт, баргузор нашуд. Арабистони Саудӣ тасмим гирифт, ки имсол зоиринро аз кишварҳои дигар намепазирад ва маросими Ҳаққ танҳо бо ҳузури 60 ҳазор зоири дохилӣ барпо мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
