Маросими намози ҷанозаи Сафарбек Солеҳ, коргардони маъруфи тоҷик, ба субҳи рӯзи 20-уми июл, пас аз намози Иди Қурбон мавқуф гузошта шудааст. Дар ин бора Сафар Ҳақдод, раиси Иттиҳодия синамогарони Тоҷикистон хабар медиҳад.
Қарор буд, пас аз намози асри имрӯз намози ҷанозаи ин коргардони шуҳратёри тоҷик хонда шавад.
Фардо, намози ҷаноза дар масҷиди деҳаи Моинкаҷи шаҳри Ваҳдат, пас аз намози Иди Қурбон хонда мешавад.
Сафарбек Солеҳ, зуҳри имрӯз, пас чанд рӯзи гирифторӣ ба коронавирус дар сини 62-солагӣ даргузашт. Ӯ худаш чанд рӯз пеш, дар фейсбук аз беморияш хабар дода буд ва аз дӯстон хоста буд, дар ҳаққаш дуогӯй бошанд.
Сафарбек Солеҳ 15-уми сентябри соли 1959 дар шаҳри Душанбе ба дунё омадааст. Соли 1980 аз бахши забону адабиёти Донишгоҳи давлатии Тоҷикистонро бо дипломи аъло фориғ мешавад, вале ба синамо бештар майл мекунаду ба ҳамин ҳунар дил медиҳад.
Билахира ин ишқу алоқа ӯро ба мактаби Мактаби олии сенариянависон ва коргардонҳои Маскав бурд ва соли 1993 ин мактаби ҳунариро хатм кард.
Муддате дар киностудияи “Тоҷикфилм” коргардон буд. Соли 2004 баъди хатми бахши ҳуқуқи Донишгоҳи давлатии Қирғизистон ва дарёфти дипломи ҳуқуқ муддате коршиноси ҳуқуқии Бонки ҷаҳонӣ буд ва баъди он то поёни умр дар дафтари Созмони Милали Муттаҳид дар Душанбе ифои вазифа мекард.
Ин коргардони пуровозаи кишвар наздик ба 25 филм сохта буд, ки чандин ҷоизаҳои байналмилалиро ба Тоҷикистон оварда буданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
