Интиқоли пул аз ҷониби шахсони воқеӣ аз Русия ба Тоҷикистон тариқи низомҳои пардохт дар муқоиса бо соли 2020 дар соли 2021 ба андозаи 3,1% (54 млн доллар) зиёд шуд.
Мутобиқи маълумоти рӯзи 16 март нашршудаи Бонки марказии Русия, дар соли 2021 ҳаҷми интиқоли маблағ ба Тоҷикистон 1 млрд 795 млн долларро ташкил додааст. Соли гузашта ин нишондиҳанда ба 1 млрд 741 млн доллар баробар буд.
Маблағи як интиқол дар соли 2021 ба ҳисоби миёна 160 долларро ташкил додааст, ки 9 доллар зиёдтар нисбат ба соли 2020 мебошад.
Тоҷикистон яке аз кишварҳое мебошад, ки ба интиқоли пули муҳоҷирони корӣ аз давлатҳои хориҷа вобаста аст. Дар соли 2021 муомилоти молиявӣ (транзаксия) аз Русия 20,5% аз ҳаҷми ММД-и соли гузаштаи ҷумҳуриро ташкил додааст.
Бино ба маълумоти мақомоти муҳоҷирати Русия, дар Русия зиёда аз 1 млн нафар шаҳрвандони Тоҷикистон кору зиндагӣ мекунанд.
Аз Тоҷикистон зиёдтар дар соли гузашта танҳо ба Ӯзбекистон маблағ интиқол дода шудааст, ки он ба 3,2 млрд доллар баробар аст.
Интиқоли пул ба Қирғизистон ба маблағи 1,1 млрд доллар, Арманистон – 531 млн доллар, Озарбойҷон – 346 млн доллар, Украина – 301 млн доллар, Молдова – 137 млн доллар, Беларус – 69 млн доллар ва Қазоқистон –66 млн доллар сурат гирифтааст.
Соли гузашта интиқоли пули нисбатан зиёдтар аз Русия ба кишварҳои хориҷи дур ба Туркия (358 млн доллар), Гурҷистон (254 млн доллар) ва Чин (117 млн доллар) амалӣ шудааст.
Коршиносони Бонки ҷаҳонӣ аввали моҳи март изҳор доштанд, ки соли 2022 “интиқоли маблағ ба Озарбойҷон, Арманистон, Тоҷикистон ва Ӯзбекистон шояд ба таври назаррас коҳиш ёбад”.
Коҳиши интиқоли маблағ ба Тоҷикистон дар муқоиса бо соли пешин дар сатҳи 22% пешгӯӣ мешавад.
Ин пешгӯиҳо ба “паст шудани фаъолмандии иқтисодӣ дар Русия ва беқурбшавии рубл нисбат ба доллари ИМА” асоснок мешавад.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
