Сардори Хадамоти гумруки Тоҷикистон басташавии сарҳад миёни Тоҷикистону Қирғизистонро як сабукӣ номид ва гуфт, он имкон дод, ки қочоқи молу маҳсулот байни ду кишвар ба таври чашмрас кам ва ҳатто аз байн равад.
Хуршед Каримзода, сардори хадамоти гумрук, имрӯз, 13 июл дар нишасти матбуотии ниҳоди зери роҳбариаш гуфт, ки то ҳол 5 гузаргоҳи сарҳади миёни Тоҷикистон ва Қирғизистон баста аст, вале тавассути кишвари сеюм молу маҳсулоти ин кишвар ба Тоҷикистон ворид мешавад.
Ӯ афзуд, молу маҳсулоти ин кишвар тавассути кишварҳои Қазоқистон ва Ӯзбекистон ба Тоҷикистон ворид мешавад ва дар шаш моҳи соли равон гардиши молӣ бо Қирғизистон ҳамагӣ 6,6 млн долларро ташкил додааст, ки ин нисбат ба ҳамин давраи соли гузашта ба маблағи 8 млн доллар кам мебошад.
Ба таъкиди роҳбари ин ниҳод, қисми асосии гардиши молӣ байни ду кишварро воридот аз Қирғизистон ташкил медиҳад, ки 6,3 млн долларро дар бар гирифт.
Ба гуфтаи ӯ, асосан аз ин кишвар ангишт ворид шудааст.
– Дар замоне ки сарҳадҳо боз буд, қочоқи молу маҳсулот байни ду кишвар дар як дарҷаи муайян ҷой дошт. Ба ғайр аз қочоқи мол, дар бозорҳои наздисарҳадӣ аҳолии ду кишвар молу колоҳоро харидорӣ ва ғайриқонунӣ ба кишварҳои якдигар мегузарониданд. Танҳо дар бозори наздисарҳадие, ки дар ноҳияи Бобоҷон Ғафуров ҳаст, 36 нуқтаи фуруши сӯзишворӣ ва мағозаҳои фурӯши яклухт ва хӯрока ҳисоб кардем. Қочоқи молу маҳсулот муташаккилона ба роҳ монда шуда буд. Бо баста шудани сарҳад дар ин самт баъзе сабукиҳо шуд. Қариб, ки қочоқ ошкор намешавад. Вале вақте аҳолӣ ба ҳам наздиканд, хоҳем нахоҳем, байни аҳолӣ додугуруифт мешавад,- гуфт Каримзода.
Ёдовар мешавем, ки сарҳад байни Тоҷикистону Қирғизистон баъди даргирии хунини охири моҳи апрели соли 2020, ки дар он аз ҳарду тараф 50 кас кушта ва беш аз 300 нафар захмӣ шуданд, пурра баста шуд.
Тоҷикистон ва Қирғизистон 976 километр марзи муштарак доранд, ки танҳо 504 километри он аломатгузорӣ шудааст. Ҳамзамон 472 километри дигари сарҳади давлатии миёни ду кишвар номуайян боқӣ мемонад. Аз ин рӯ, сари чанд муддат ҷангу даъвоҳо барои замин, сохтмон, об ва роҳ сар мезанад. Ва дар ниҳоят чанд захмиву кушта ба ҷой мегузорад, ки аксаран мардуми мулкӣ қурбони ин муноқишаҳои марзӣ мегарданд.
