Дар шаҳри Маскав Маркази фарҳангиву намояндагии Тоҷикистон боз мешавад. Он дар маркази шаҳр бо суроғаи: кӯчаи 2-юми Тверская-Ямская, х. 40 воқеъ аст. Айни замон дар ин ҷо “Маҷмааи меҳмонхонаи Дастгоҳи иҷроияи президенти Тоҷикистон” ҷойгир шудааст.
Тавре ки хабаргузории ТАСС иттилоъ медиҳад, минбаъд бепул ба ихтиёри Тоҷикистон додани иншооти мазкур ба нақша гирифта шудааст.
Қаблан президенти Русия Владимир Путин зимни гуфтугӯ бо сарвари давлати Тоҷикистон Эмомалӣ Раҳмон тариқи видео изҳор намуд, ки ҳукумати Маскав барои таъсиси маркази фарҳанг дар маркази шаҳр бино ҷудо намуда, ҳамаи хароҷоташро ба уҳдаи худ мегирад.
“Ҳукумати Маскав дар бораи ба таври бебозгашт ба моликияти Федератсияи Русия супурдани бинои масоҳаташ 5,039 метри мураббаъ қарор қабул кард, ки ҳозир дар он маҷмааи меҳмонхонаи Дастгоҳи иҷроияи президенти Тоҷикистон ҷойгир шудааст. Минбаъд дар доираи созишномаи байниҳукуматӣ ба таври бебозгашт ба ихтиёри Тоҷикистон додани иншооти ғайриманқули мазкур ҷиҳати дар он ҷойгир намудани маркази фарҳангиву намояндагӣ ба нақша гирифта шудааст”, – хабар додааст сухангӯи шаҳрдори пойтахти Русия, роҳбари хадамоти матбуот ва ҳукумати шаҳри Маскав Гулнора Пенкова.
