Бо гузашти қариб як моҳи зиндонӣ шудани Абдуллоҳ Ғурбатӣ, яке аз рӯзноманигорони тоҷик, Прокуратураи генералии Тоҷикистон баъзе ҷузъиёти парвандаи ҷиноятии ӯро ошкор кард ва гуфт, ӯ чаро боздошт ва ҳабс гардид.
Дар изҳороти ин ниҳод, ки шоми имрӯз, 3-юми ноябр, дар сомонаи расмии Прокуратураи генералии Тоҷикистон нашр шуд, Абдуллоҳ Ғурбатӣ ба фаъолияти ифротгароӣ (экстремистӣ), бадномсозии сиёсати пешгирифтаи давлату Ҳукумати Ҷумҳурии Тоҷикистон дар шабакаи иҷтимоии “Фейсбук” ва зӯроварӣ алайҳи намояндаи ҳокимияти давлатӣ муттаҳам мешавад.
“Давоми солҳои 2021-2022 аз ҷониби Ғурбатов А.У. (Абдуллоҳ Ғурбатӣ-дар назар аст) дар шабакаи иҷтимоии интернетии «Фейсбук» чандин матлабҳо ва мақолаҳо ошкоро ва пардапӯшон нашр шудаанд, ки дар он пайваста бадномсозии сиёсати пешгирифтаи давлату Ҳукумати Ҷумҳурии Тоҷикистон дида шуда, дар амалу кирдорҳои Ғурбатов А.У. аломатҳои фаъолияти экстремистӣ ҷой доранд”, – зикр мегардад дар изҳороти Прокуратураи генералӣ.
Прокуратура навиштаи зерини Абдуллоҳ Ғурбатиро ҳамчун мисол овардааст: “Агар ин миллат як соҳиб медошт, Агар ин давлат як қонун медошт, Агар ин ҳуқумат як вазир медошт, ҷавони тоҷик аз тиреза поин фикандани худро аз хидмат ба ин миллат боло намедонист!!! Ва ё ҷавони тоҷикро ба ҳиллаву фиребу найранг ба хидмати модару ватан намебурданд. Ҳоло ҳар дашноме мехоҳед ба ман бидиҳед ба «биҳишти рӯӣ заминатон бовар надорам. Ба ягон идеяи миллӣ, ба ягон вазиру кабиру пешво бовар надорам. Ғурури миллӣ чӣ ки худи миллат буданамон зери суоли калон рафтааст”.
Ин матнро Абдуллоҳ Ғурбатӣ рӯзи 12-уми майи соли равон, дар шарҳи “облава”-и донишомӯзони Омӯзишгоҳи тиббии ноҳияи Ёвон дар Фейсбук навиштааст.
Дар идома, Прокуратураи генералӣ гуфтааст, ки Ғурбатӣ бо имзои мустаъор, барои амалӣ намудани фаъолияти экстремистии худ, рӯзи 13 ноябри соли 2019 ба канали «Аzda tv» дар шабакаи иҷтимоии интернетии «Ютуб» аъзо шудааст, ки он ба яке иттиҳодияи дорои хусусияти экстремистӣ ва террористидоштаи «Паймони миллӣ», «Ҳизби наҳзати ислом» (фаъолияти ҳарду ташкилот дар Тоҷикистон мамнӯъ аст) мансуб мебошад.
“Наворҳои паҳн намудаи онро («Аzda tv»- дар назар аст) пайгирӣ намуда, барои рангинсозии барномаҳои худ истифодабарӣ менамудааст”, – омадааст дар изҳороти Прокуратураи генералӣ.
Ин ниҳод гуфтааст, вақте Абдуллоҳ Ғурбатӣ рӯзи 15-уми июни соли 2022 дар доираи парвандаи ҷиноятии Далери Имомалӣ, рӯзноманигори дигари зиндонии тоҷик, ҳамчун шоҳид ба ШВКД-1 дар ноҳияи Шоҳмансури пойтахт даъват шуд, майор Муродов Ҷ.Д., корманди ин шуъбаро суханҳои қабеҳ ва дашном дода, ӯро таҳқир кардааст.
“Ғурбатов А.У. кирдорҳои ҷинояткоронаи худро давом дода ба суханҳои қабеҳ задааш, дашном доданаш ва таҳқири кардааш нисбати сардори МХМ№7 ШВКД-1 дар ноҳияи Шоҳмансури шаҳри Душанбе, майори милитсия Муродов Д.Ҷ., қаноат накарда, дидаю дониста, ки номбурда дар вақти иҷрои вазифаи хизматӣ мебошад, дар дохили нуқтаи гузаргоҳи назорати қисми навбатдорӣ ШВКД-1-и номбурда, бо истифодаи зӯроварӣ пагони китфи чап ва чор адад тугмаи куртаи низомии Муродов Д.Ҷ.-ро канда дар ҳузури шаҳрвандон як мушт ба гарданаш задааст”, – омадааст дар изҳороти Прокуратураи генералӣ.
Гуфтан ба маврид аст, ки ин ягона ниҳоди расмии Тоҷикистон мебошад, ки дар робита ба сабабҳои боздошт ва зиндонӣ шудани рӯзноманигор Абдуллоҳ Ғурбатӣ шарҳи расмӣ интишор намуд.
Ёдовар мешавем, ки Абдуллоҳ Ғурбатӣ моҳи июни соли равон боздошт ва бар зиддиаш бо се моддаи Кодекси ҷиноятӣ парванда боз гардид. Ӯ рӯзи 4-уми октябр бо ҳукми суди ноҳияи Шоҳмансур 7,5 сол равонаи зиндон шуд. Ғурбатӣ худашро дар суд бегуноҳ эътироф кард ва ҳамкоришаро бо ҳизбу ҳаракатҳои фаъолияташон дар Тоҷикистон мамнӯъро қотеъона рад кардааст.
Ӯ замоне боздошт гардид, ки дар робита ба парвандаи Далери Имомалӣ, блогери боздоштшудаи тоҷик ба прокуратураи ноҳияи Шоҳмансур даъват гардида буд.
Дар оғоз, мақомот ӯро барои “таҳқири намояндаи ҳокимият, истифодаи зӯроварӣ ба муқобили намояндаи ҳокимият” (моддаҳои 330 қисми 1 ва 328 қисми 1 Кодекси ҷиноятии Тоҷикистон) гумонбар медонистанд, вале баъдан Абдуллоҳ дар иштирок ба ҳизбу ҳаркатҳои дар Тоҷикистон манӯъ (моддаи 307 иловаи 3 қисми 2 Кодекси ҷиноятии Тоҷикистон) гунаҳкор дониста шуд.
