Роҳи зеризаминии назди Беморхонаи шаҳрӣ ва меҳонхонаи “Эҳсон” дар шаҳри Хуҷанд, ки макони серодам ба ҳисоб меравад, бастааст. Раиси шаҳри Хуҷанд мегӯяд, ки он “тангу борик аст”. Сокинон чӣ кор бояд кунанд?
Дар шаҳри Хуҷанд солҳои охир чандин роҳи зеризаминӣ аз истифода мондааст ва сокинон маҷбуранд, ки роҳро аз ҷойи манъшуда убур кунанд, ки ин боиси эҷоди хатар ба ҷони онҳо мегардад. Аз ҷумла, роҳи зеризаминии назди Беморхонаи шаҳрӣ ва меҳонхонаи “Эҳсон”, ки макони серодам ба ҳисоб меравад, чандин муддат мешавад бастааст.
Пиёдагардоне, ки дар ин макон роҳро аз ҷойи манъшуда убур мекунанд, аксаран мегӯяд, ки баста будани роҳи зеризаминӣ онҳоро маҷбур ба вайрон кардани қоидаи роҳ ва ба хатар гузоштани ҷонашон, мекунад.
Бисёре аз сокинон дар ин минтақаи шаҳри Хуҷанд савол медиҳанд, ки чаро роҳи зеризаминӣ баста аст ва убур аз он манъ шудааст.
Фирдавс Шарифзода, раиси шарҳи Хуҷанд дар нишасти матбуотии ахири худ, тобистони имсол, сабаби аз истифода бозмондани роҳи зеризаминии мавзеи зикршударо фарсудагии он унвон карда буд.
“Ин роҳи зеризаминӣ дар замони Шӯравӣ сохта шудааст ва ба талаботи имрӯза ҷавобгуй нест. Тангу борик аст. Дар ин роҳи зеризаминӣ, мисли роҳҳои зеризаминии муосир, имконияти кушодани мағозаҳо ва дигар нуқтаҳои савдо вуҷуд надорад”, – гуфта буд раиси шаҳр.
Ӯ ваъда дода буд, ки баъди ба истифода додани биноҳои баландошёнаи канори роҳ, ин роҳи зеризаминӣ пурра ба истифода дода мешавад.
Бо гузашти чанд моҳ аз ин ваъдаи раиси шаҳр, ин роҳи зеризаминӣ то ҳол баста буда, одамон ҳамоно аз қитъаи манъшудаи роҳ убур мекунанд ва ҳаёти худро дар хатар мегузоранд.
Мушоҳидаҳо нишон медиҳанд, ки бештари қоидавайронкунии пиёдагардон дар роҳи байни бозорҳои Панҷшанбе, Атуш ва Сомон, Беморхонаи шаҳрӣ, маҷмаи таърихӣ – фарҳангии Истиқлол, чорроҳаи Раҳимии шаҳри Хуҷанд ба қайд гирифта мешавад ва сабаби асоси онро дар набудан ё аз истифода боз мондани роҳҳои зеризаминӣ маънидод мекунанд.
