Акнун сокинони шаҳри Душанбе рақами қайди давлатии мошинҳоро метавонанд ба ҷои силсилаи “01” бо силсилаи “10” дастрас кунанд. Дар ин бора аз Раёсати Бозрасии давлатии автомобилӣ (БДА)-и ВКД хабар доданд.
Як корманди масъули ин ниҳод дар суҳбат бо “Азия-Плюс” бо тасдиқи ин иттилоъ гуфт, “аз сабаби он ки ҳарфҳои аломати қайди давлатии силсилаи “01”, ба охир расид, тасмим гирифта шуд, ки силсилаи аломати қайди давлатии мошинҳо нав – “10” карда шавад”.
Ӯ гуфт, ин тасмим ҳоло танҳо дар шаҳри Душанбе роҳандозӣ шудааст ва дар минтақаҳо додани рақами қайди мошинҳо бо силсилаи “02”, “03” ва ё “04” идома дорад.
“Ҳоло “комбинатсия”-и ҳарфҳо дар аломати қайди давлатии силсилаи “02”, “03”, “04” ва “05” мавҷуд аст ва ҳоҷат ба иваз кардани силсилаи ин аломатҳо нест. Аз ин рӯ, ин тасмим танҳо дар шаҳри Душанбе гирифта шудааст”, – гуфт манбаъи мо.
Вале корбарони шабакаҳои иҷтимоӣ мегӯянд, силсилаи аломати қайди давлатии мошинҳо дар минтақаҳо ҳам иваз шудааст. Ин то куҷо дуруст аст, маълум нест.
Ҳамсуҳбати мо аз БДА гуфт, рақами қайди мошинҳо, ки пештар бо силсилаи “01” дода шудааст, иваз карда намешавад ва танҳо онҳое, ки мехоҳанд рақами нав гиранд, бо силсилаи нав метавонанд рақамро дастрас кунанд.
“Ин тасмим шурӯъ аз соли 2023 рӯйи даст гирифта шуд. Дар робита ба ин масъала квота ҷудо шудааст ва аҳолӣ метавонанд дар доираи он рақамҳоро бо чунин силасилаҳои нав харидорӣ кунанд””,- гуфт манбаъи мо.
Имрӯзҳо, дар кӯчаҳои Душанбе мошинҳоеро бо аломатҳои қайди давлатии силсилаи “10” вохӯрдан мумкин аст. Истифодаи чунин рақамҳо миёни ҷомеаи ҳадсу гумонҳоеро ба бор овардааст ва аҳолӣ бар ин назаранд, ки он ба хотири фурӯши рақамҳои қайди давлатии гаронарзиш, аз ҷумла “тиллоӣ” ва “нуқрагӣ”, ки аксаран тавассути музояда аз ҷониби БДА ба фурӯш гузошта мешавад, роҳандозӣ шудааст.
Чунин иддаоро аз БДА дар суҳбат бо “Азия-Плюс” рад карданд ва гуфтанд, ин як тасмими маъмулӣ аст, ки дар пайи ба анҷом расидани ҳарфҳо ё “комбинатсия”-и ҳарфу рақамҳо танҳо дар пойтахт роҳандозӣ карда шуд.
