Пас аз нашри гузоришҳо дар бораи ҷобаҷогузории ҷангҷӯёни покистонӣ дар вилоятҳои шимолии Афғонистон, Ҷабҳаи озодӣ мегӯяд, ки ин амали Толибон* заминаҳои ҳампазирӣ ва зисти мусолиматомези қавмҳоро нобуд мекунад. Дар ин бора рӯзномаи “8 субҳ”-и Афғонистон хабар медиҳад.
Ин ҷабҳаи низомии зидди Толибон* имрӯз, 15 июн, дар изҳороте тағйири рафтори ҷамъиятӣ дар шимоли Афғонистон аз сӯйи онҳоро барномарезишуда хонда гуфтааст, “Толибон тухми нифоқ, тундравӣ ва терроризмро дар сарзамини мо мекоранд."
Бар асоси эъломияи Ҷабҳаи Озодӣ, Толибон* дар канори равобити наздик бо “Ал-Қоида”* ва “ДОИШ”* барои гурӯҳҳои дигари террористӣ, аз қабили “Ансоруллоҳ”, “Ҳаракати исломии Туркистони Шарқӣ” ва “Ҳаракти исломии Ӯзбекистон” дар вилоятҳои шимоли Афғонистон мусоидат кардаанд.
Ин ҷабҳа паёмадҳои интиқоли Толибони Покистон ба шимолро ба кишварҳои минтақа ва ҷаҳон хатарнок хондааст.
Ба иттилои манбаъ пас аз нашри хабарҳо дар расонаҳо дар бораи интиқоли Толибони Покистон аз нуқтаҳои марзӣ, Забеҳулло Муҷоҳид, сухангӯи Толибон ин мавзӯъро таъйид кардааст.
Ӯ дар сӯҳбат бо расонаҳо гуфтааст, ки шояд барои рафъи нигарониҳо бархе аз муҳоҷирони покистонӣ аз минтақаи марзии ду кишвар (Покистон ва Афғонистон) ба вилоятҳои шимолӣ интиқол дода шаванд.
Ин тасмими Толибон боиси нигаронии аксари шаҳрвандони Афғонистон ва ҷараёнҳои низомию сиёсии зидди Толибон шудааст.
Қаблан Ҷабҳаи муқовимати миллӣ ба раҳбарии Аҳмад Масъуд ва Шӯрои олии муқовимати Афғонистон низ ин амали гурӯҳи Толибонро* тағйирот дар сохтори ҷамъиятии мардум дар шимоли ин кишвар хонда буданд.
*Дар Тоҷикистон гурӯҳи террористӣ эътироф шудааст.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
