Дастаи “Истиқлол”-и Тоҷикистон дар қуръакашии Лигаи қаҳрамонҳои Осиё бо дастаи “Ал-Наср”-и Арабистони Саудӣ дар як гурӯҳ қарор гирифт ва ҳамакнун, Криштиану Роналдо, сардори ин дастаи арабӣ ба Тоҷикистон хоҳад омад.
Маросими қуръакашӣ имрӯз, 24-уми август, дар шаҳри Куала – Лумпури давлати Малайзия баргузор гардид.
Дар гурӯҳи Е якҷо бо “Истиқлол” ва “Ал-Наср” ҳамчунин, дастаҳои “Персаполис”-и Эрон ва “Ал-Дуҳайл”-и Қатар низ шомиланд.
Даври аввали марҳилаи гурӯҳии бозиҳои Лигаи қаҳрамонҳои Осиё 19-уми сентябр оғоз мешавад. То 13-уми декабр бозиҳои марҳилаи гуруҳӣ ба анҷом мерасад ва ғолибони гурӯҳ ба марҳилаи дигар роҳ меёбанд.
Дар ин марҳила дастаи “Истиқлол”-и Душанбе ду маротиба бо дастаи “Ал-Наср” – як маротиба дар майдони худ ва маротибаи дигар дар сафар бозӣ мекунад.
