Аз 1 сентябр шумори автобусу троллейбусҳо дар хатсайрҳои мусофирбари шаҳри Душанбе 20% зиёд карда мешавад, хабар доданд ба “Азия-Плюс” аз дафтари матбуоти шаҳрдории пойтахт.
Ба иттилои манбаъ, бинобар сабаби оғози соли нави хониш ва дар робита ба афзоиши теъдоди мусофирон дар хатсайрҳо чунин тасмим гирифта шудааст.
“Шумори ин навъи нақлиёт 100 адад зиёд карда мешавад. Яъне агар имрӯз дар хатсайрҳои пойтхат 350 адад автобусу троллейбусҳо равуо дошта бошанд, пас аз 1 сентябр шумори онҳо ба 450 адад расонида мешавад, – гуфтанд дар шаҳрдорӣ. – Шумори микроавтобус (маршрутка) ва таксиҳо бетағйир боқӣ мемонад”.
Қаблан моҳи июл зимни нишасти матбуотӣ дар шаҳрдории пойтахт муовини аввали раиси шаҳри Душанбе Саидзода Фирдавс Ҳамро вазъи марбут ба нақлиёти ҷамъиятиро дар шаҳр ба рӯзноманигорон шарҳ дода буд.
Ба гуфтаи вай, айни замон норасоии назарраси нақлиёти ҷамъиятӣ дар шаҳр ба мушоҳида намерасад.
Зикр шуда буд, ки дар моҳҳои фасли тобистон ҳамарӯза 300 автобус, 64 троллейбус, зиёда аз 1100 микроавтобус (маршрутка) ва ҳудуди 2 ҳазор таксӣ ба сокинони пойтахт хидматрасонӣ мекунанд.
Он замон ӯ зикр карда буд, ки бо оғози соли нави хониш – аз 1 сентябр шумори нақлиёти мусофирбари ҷамъиятӣ зиёд карда мешавад.
Дар ҳамин ҳол, сокинони шаҳр аллакай аз ҳозир шикоят мекунанд, ки дар хатсайрҳои муайян камбуди нақлиёти ҷамъиятиро эҳсос мекунанд.
