Маркази тиббии Оқохон дар шаҳри Хоруғ бо нашри як изҳороти кӯтоҳ баста шудани беморхонаро расман рад кард.
Дар ҳоле, ки тӯли чанд вақт мешавад, ки дар шабакаҳои иҷтимоӣ хабари баста шудани Маркази тиббии Оқохон дар шаҳри Хоруғ паҳн гардидаааст.
Маркази тиббии Оқохон дар саҳифаи расмии худ дар шабакаи фейсбук навишт: “Ба маълумоти шумо мерасонем, ки Маркази тиббии Оқохон дар шаҳри Хоруғ боз аст ва ба таври мӯътадил кор мекунад”.
Дар ин изҳорот ҳамчунин зикр мегардад, ки “масъалаи ҳуқуқӣ бо мақомоти дахлдор барасӣ мешавад”.
Вале дақиқ гуфта нашудааст, ки кадом масъалаҳои ҳуқуқӣ дар ҳоли баррасӣ аст ва сарчашмаи хабарҳои носаҳеҳ чист.
Кӯшишҳои мо ҳам барои дастрас кардани назари расмии Маркази тиббии Оқохон бесамар анҷомид.
Бояд гуфт, ки қаблан литсейи Оқохон дар Хоруғ ба далели “мушкилоти ошкоршуда дар барномаи таълимӣ ва мутобиқат накардан ба стандартҳои таълимӣ” давлатӣ карда шуда буд.
Пештар аз ин Радиои Озодӣ иттилоъ дода буд, ки литсей ягона муассисаи зертобеи шабакаи Оқохон нест, ки давлатӣ карда мешавад. Қаблан Додгоҳи олии иқтисодии Тоҷикистон хабар дода буд, ки Додситонии ВМКБ аз онҳо тақозо кардааст, то сертификати ҳуқуқи истифодаи замини Донишгоҳи Осиёи Миёна беэътибор дониста шуда, замин ба ҳукумати шаҳри Хоруғ баргардонда шавад.
Гуфта мешавад, ки замини Донишгоҳи Осиёи Марказӣ дар шаҳри Хоруғ охири солҳои 90-ум аз сӯи Шабакаи Оқохон харидорӣ шуда, соли 2000-ум донишгоҳ таъсис ёфтааст.
Ҳамчунин, меҳмонхонаи “Серена”, вобаста ба Шабакаи Оқохон (AKFED), дар маҳаллаи Теми шаҳри Хоруғ ва Боғи марказии фароғатии шаҳри Хоруғро, ки зери сарпарастии Бунёди Оқохон буданд низ ба моликияти давлат табдил ёфтаанд.
