Аз 14 то 17-уми ноябри соли 2023 дар шаҳри Душанбе 16-умин форуми байналмилалии муколамаи забон ва фарҳанги кишварҳои узви Иттиҳоди Давлатҳои Мустақил (ИДМ) дар асри ХХI баргузор мегардад. Дар ин бора аз Донишгоҳи миллии Тоҷикистон (ДМТ) ба “Азия-Плюс” хабар доданд.
Ба гуфтаи манбаъ, ин форум таҳти номи “Ташаккули фазои инноватсионии башардӯстона дар ИДМ ва нақши забони русӣ дар шароити бисёрзабонӣ ва бисёрфарҳангӣ” дар ҳамкорӣ бо Донишгоҳи давлатии забоншиносии Маскав баргузор мешавад.
“Форуми байналмилалӣ дар доираи чорабиниҳое, ки ба рушди муколамаи байнифарҳангӣ, фазои ягонаи таълимӣ ва ҳамкориҳои башардӯстонаи кишварҳои узви ИДМ дар соҳаи маориф нигаронида шудаанд, баргузор мешавад”, – гуфт ҳамсуҳбати мо.
Таъкид гардид, ки дар форуми мазкур ширкати олимону устодони донишгоҳҳои Тоҷикистон, Ӯзбекистон, Русия, Молдова ва Озарбойҷон дар назар аст.
Ҳамчунин, дар идомаи ҳамин форум рӯзҳои 27-29-уми ноябр дар Мински Белорусия конгресси сеюми байналмилалии “Сиёсати забонии кишварҳои ИДМ” баргузор мешавад.
Дар ин конгресс ҳам ширкати олимону устодони донишгоҳҳои Тоҷикистон дар назар аст.
