Вазорати корҳои хориҷии Ӯзбекистон сафири Русия дар шаҳри Тошканд Олег Малгиновро барои суханҳои Захар Прилепин, нависанда ва ҳамраиси ҳизби “Русияи одил – барои ҳақиқат”, ки чанде пеш пешниҳод кард қаламрави Ӯзбекистонро ба Русия ҳамроҳ карда шавад, ба суҳбат даъват кардааст.
Дар хабари вазорат гуфта мешавад, ки “чунин изҳорот ба рӯҳияи равобити дӯстонаи ду кишвар мувофиқат намекунад ва метавонад ба муносибатҳои дӯстонаи таърихӣ байни халқҳои мо таъсири манфӣ расонад”.
Сафири Русия зикр кардааст, ки суханҳои Захар Прилепин “мавқеи расмии роҳбарияти Русияро дар мавриди Ӯзбекистони дӯсту соҳибистиқлол инъикос намекунад”.
Сафир ҳамчунин гуфтааст, ки “дар кишвари ӯ ҳеҷ гоҳ соҳибихтиёрӣ, истиқлолият ва тамомияти арзии Ӯзбекистон зери шубҳа гузошта нашудааст”.
Олег Малгинов зикр кардааст, ки Вазорати корҳои хориҷии Русия ният дорад дар ояндаи наздик ин ҳодисаро шарҳ диҳад.
Бояд гуфт, чанде пеш Захар Прилепин дар яке аз суханрониҳояш гуфт, мушкили занозании муҳоҷирон дар Русияро мешавад бо роҳи ҳамроҳ кардани қаламравҳои нав, аз ҷумла Ӯзбекистон ба ҳайати кишвараш ҳал кард.
