Аз 35 нафар муҳоҷири меҳнатии тоҷик, ки дар корхонаи “Химпек”-и Русия бо талаби баланд кардани маош эътироз карда, баъдан аз ҷониби корфармо аз кор ронда шуданд, 25 нафарашон дубора ба кор баргардонида шудааст. Дар ин бора намояндагии Вазорати меҳнат, муҳоҷират ва шуғли аҳолии Тоҷикистон дар Русия зимни як посухи катбӣ ба “Азия-Плюс” хабар дод.
Намояндагӣ гуфт, бо мақсади муайян намудани ҳодиса дар якҷоягӣ бо кормадони Сафорати Тоҷикистон дар Русия ба ҷои ҳодиса рафта, бо роҳбарияти ширкат ва муҳоҷирони меҳнатӣ мулоқот кардаанд.
Ин ниҳод таъкид кард, ки сабаби корпартоии муҳоҷирон “иғвоангезии 2-3 нафар шаҳрванди Тоҷикистон аст, ки қаблан дар Британияи Кабир кор мекараданд ва баъзеҳоро ба доми фиреб, қисми дигари кормандонро маҷбуриву бо роҳи тарс ба корпартоии оммавӣ маҷбур сохтаанд”.
Ба гуфтаи ин ниҳод “корфармо тамоми уҳдадориҳои худро дар доираи шартномаи меҳнатии бо кормандон имзошуда иҷро карда, ба ягон ҳуқуқвайронкунӣ роҳ надодааст. Барои кормандон ҷойҳои кории мураттаб ва хобгоҳҳои озодаву таҷҳизонидашуда муҳайё намудааст”.
Бо вуҷуди ин, рӯзи 15-уми январи соли равон 55 корманд аз ҳисоби муҳоҷирони меҳнатии тоҷик ва ӯзбек дар корхонаи саноатии “Химпек”-и шаҳраки Шахтинскии вилояти Ростов аз роҳбарияти корхона зиёд намудани музди меҳнат ва рухсатпулиро талаб намуда, маслиҳати корпартоии оммавӣ кардаанд.
Онҳо талаб кардаанд, ки маошашон 20-25 дарсад баланд карда шавад, дар ҳоле, ки ба гуфтаи намояндагии вазорат, соли 2023 маоши кормандон дар ҳудуди 15 фисад зиёд гардида, 80-85 ҳазор рублро ташкил медиҳад.
Ин ниҳод гуфт, корхона шартҳои гузоштаи “иғвоангезон”-ро қабул накарда, маоши онҳоро барои 15 рӯзи корӣ дар моҳи январ пардохта, аз кор озод кардааст.
“Пас аз озод гардидани 25 нафар шаҳрвандони Ҷумҳурии Тоҷикистон намояндагони расмӣ бо роҳбарияти корхона гуфтушунид гузаронида, нофаҳмиҳо рафъ гардида, онҳо бо пушамймонӣ аз кори худ ва бо ваъдаи дубора такрор накардани чунин амал ба ҷойи кор баргаштанд”, – гуфтанд аз намояндагии Вазорати меҳнат, муҳоҷират ва шуғли аҳолии Тоҷикистон дар Русия.
Назари худи муҳоҷирони корӣ дар корхонаи “Химпек” айни ҳол маълум нест.
Ёдовар мешавем, ки дар бораи корпартоӣ ва баъдан аз кор ронда шудани қариб 100 муҳоҷири кории тоҷик бори аввал Радиои Озодӣ хабар дода буд.
Бояд гуфт, ки ширкати “Химпек” бузургтарин истеҳсолкунандаи зарфҳо ва борхалтаҳо барои боркашонӣ, таъминкунадаи ашёи хоми кимиёвӣ, металлургӣ, шиша, сафол, сохтмон ва дигар соҳаҳо мебошад.
