Дар Ботканд вохӯрии дуҷонибаи намояндагони Тоҷикистону Қирғизистон баргузор шуд. Дар ин бора Turmush хабар медиҳад.
Ҳайати Қирғизистонро муовини аввали ҳокими ноҳияи Ботканд Таалайбек Ибраимов ва Тоҷикистонро – раиси ноҳияи Исфара Баҳоваддин Баҳодурзода роҳбарӣ карданд.
Вохӯрӣ дар мавзеи наздимарзии деҳаи Уртабузи Қирғизистон ва маҳаллаи аҳолинишини Хоҷаи Аълои Тоҷикистон баргузор шуд.
Бино ба маълумоти Turmush, ҷонибҳо масоили марбут ба оби нӯшокиро, ки аз Ворухи Тоҷикистон ба авулҳои Оқ-Сой, Оқ-Татир, Самарқандеки ноҳияи Ботканд меояд, баррасӣ карданд.
Гуфта мешавад, зимни вохӯрӣ ҳамчунин масоили вобаста ба сарҳад, таъмини тартиботи ҳуқуқӣ, оби нӯшокӣ, иҷрои мувофиқашудаи ҳамаи корҳо дар минтақаҳои наздимарзӣ баррасӣ шуданд.
Зимнан зикр мегардад, ки ҷонибҳо ҳамчунин оид ба масъалаи пешгирии сохтмон ва дигар навъҳои фаъолият дар қаламравҳои мувофиқанашуда бидуни баррасии ҳарду тараф таваҷҷуҳ зоҳир намуданд.
Ёдрас мекунем, ки аввали ҳамин ҳафта зимни нишасти матбуотӣ вазири корҳои хориҷии Қирғизистон Жээнбек Кулубаев изҳор намуд, ки дар масъалаи сарҳади байни Қирғизистон ва Тоҷикистон "як қатор ҷузъиёт боқӣ мондаанд", ки ҳоло дар марҳилаи мувофиқа қарор доранд ва дар кӯтоҳтарин муддат – ду-се моҳи оянда роҳи ҳалли худро пайдо мекунанд.
