“Шабакаҳои тақсимоти барқ” мегӯяд, беш аз 601 млн сомонӣ қарзи аҳолӣ дар пайи санҷиш ҳамчун изофанависӣ ошкор шуда, аз меъёри умумии қарз ба ҳолати 1-уми январи соли 2025, ки беш аз 1,7 млрд сомониро ташкил медод, ҳазф шудааст. Дар умум, дар пайи санҷиши ин ширкат ҳудуди 1,1 млрд сомонӣ қарзе, ки солҳои пеш ҳисоб шудаанд, бо сабаби беасос будан бекор шудааст.

Ҷомӣ Умарзода, мудири раёсати даромадҳо дар самти фурӯши “Шабакаҳои тақсимоти барқ” рӯзи 9-уми феврал ба “Азия-Плюс” қарзи аҳолӣ ва пардохти онро шарҳ дод.

Ба гуфтаи Умарзода,  дар пайи санҷиши меъёри қарзи аҳолӣ ба ҳолати 1-уми январи соли 2025, ки беш аз 1 млрд 737 млн сомониро ташкил медод, 601 миллиони он бо сабаби беасос будани қарз бекор карда шудаанд.

“Ба қарзҳои солҳои қаблӣ, ҳатто аз солҳои 2000-ум пеш ҳам буданд, ислоҳот ворид карда шуда, беш аз 1,1 млрд сомонӣ, ки 601 миллиони он дар сатҳи аҳолӣ ташкил медод, ба хотири беасос будани қарздорӣ дар ҳисоботи муҳосиботӣ бекор карда шуданд. Дар соли 2025 қарзҳое, ки дар ҳисоботи солҳои қаблӣ то таъсиси ҶДММ “Шабакаҳои тақсимоти барқ” буданд, санҷида шуда, ин ҳаҷми маблағи қарз бинобар нодуруст будан дар ҳисобот, берун карда шуд”, – гуфт Умарзода. 

Ин масъули ШТБ мегӯяд, ки соли гузашта, сатҳи пардохтпазирии аҳолӣ боло рафта 99,34 дарсади пули барқи гирифтаашонро супоридаанд. Масъулин инро натиҷаи ҷорӣ кардани системаи “билингӣ” ва сангин шудани ҷазо барои истифодаи ғайриқонунии барқ рабт медиҳанд. 

“Аҳолӣ ба ҳолати 1-уми январи соли 2026-ум 2 млрд 352 млн сомонӣ маблағи барқи ҳисобидашударо пардохт кард. Ҳамагӣ 25 млн 266 ҳазор қарзи ҷории аҳолӣ боқӣ мондааст, ки мумкин аллакай ин маблағ дар давоми моҳҳои январ-феврал пардохт шудааст. Чунки дар ҳолати пардохт накардани қарзи ҷорӣ системаи “билингӣ” барқи муштариро хомӯш мекунад”, – афзуд ӯ.

Тибқи маълумоти Ҷомӣ Умарзода, қариб 1 млн 700 муштарӣ бо нерӯи барқ таъмин мешаванд, ки ҳудуди 35 дарсади он ба системаи “билингӣ” пайваст мебошанд. Ӯ мегӯяд, қисме аз қарзе, ки дар сатҳи аҳолӣ аз ҷониби муҳосибот то таъсиси “Шабакаҳои тақсимоти барқ” дар ҳисобот навишта шудаанд, беасос мебошанд, ки дар натиҷаи санҷиши суратҳисоби худи муштарӣ асоснок будан ё набудани қарзро муайян мекунанд. Дар давраи фаъолияти “ШТБ”, ки он аз соли 2021 ба кор оғоз кард, ҳамагӣ 421 млн сомонӣ қарзи аҳолӣ ҷамъ шудааст, боқимонда қарзе, ки ба аҳолӣ навишта шудаанд, аз солҳои қаблӣ будаанд. 

“Мо тариқи ирсоли паёмак ба муштарӣ оиди қарзи ҷорӣ, ки дар системаи “билингӣ” ҳисоб шудааст ва бақияи қарзи аз солҳои пешин мондаашон чанд аст, маълумот медиҳем. Мумкин чунин ҳолатҳое ҳам буданд, ки дар солҳои пеш муштарӣ дар асл ҳамон барқро истифода накардааст, аммо дар суратҳисоби ӯ нозирони барқ ҳамчун изофанависӣ навиштаанд. Мо ҳоло чунин нозирони барқро ихтисор карда истодаем”,-таъкид кард Умарзода.

Намояндаи “ШТБ” мегӯяд, ки нахуст қарзи пешинае, ки дар суратҳисоби муштарӣ навишта шудааст, таҳлил мекунанд ва дар ҳолати дуруст будани қарздорӣ ба системаи “билингӣ” ворид карда, ба муштарӣ огоҳӣ медиҳанд, то қарзашро пардозад. Дар ҳолати напардохтани қарзи аз солҳои пеш ҷамъшуда барқи муштарӣ қатъ карда мешавад. 

“Дар он ҳолате, ки қарзи муштарӣ бисёр бошад ва тибқи санҷиш ин қарздорӣ дуруст барояд, муштарӣ имкон дорад ба филиали “ШТБ” дар маҳалли худ муроҷиат карда, хоҳиш кунад, ки барояш имкон дода шавад, то қарзро марҳила ба марҳила пардохт кунад. Вобаста ба ҳаҷми маблағ, дар асоси салоҳияти роҳбарияти ШТБ тасмими тақсимбандии қарз гирифта мешавад”, – таъкид кард номбурда.

Ба шаҳрвандон тавсия дода мешавад, ки дар ҳолати ирсоли паёмак дар хусуси бақияи қарз ба филиали “ШТБ” дар маҳалли худ муроҷиат кунанд то дар ин асос дуруст будани он муайян карда шавад. 

Бояд гуфт, масъулини ширкатҳои барқрасонӣ мегӯянд, пас аз ворид кардани тағйироту иловаҳо ба Кодекси ҷиноятии Тоҷикистон дар соли гузашта, ҳолатҳои истифодаи ғайриқонунии нерӯи барқ дар кишвар тадриҷан кам шудааст. 

Аз ҷумла, соли гузашта дар пайи ошкор шудани камбудӣ дар таъмини барқ ба аҳолӣ, 125 корманди шабакаҳои барқрасонӣ ба ҷавобгарии ҷиноӣ кашида ва аз кор ронда шудаанд. Инчунин 406 корманди  идораҳои барқрасониро барои қоидавайронкунӣ дар истифодаи барқ дар ҳаҷми 293 ҳазор сомонӣ ҷарима кардаанд.

Дар соли 2025 аз сӯйи кормандони “Шабакаҳои тақсимоти барқ”  дар умум 321 млн 464 ҳазор кВт соат нерӯи барқ изофанависӣ шуда, аз ин ҳисоб ба буҷаи кишвар 106 млн 393 ҳазор сомонӣ зарар ворид шудааст.

Оҷонсии назорат дар соҳаи энергетика борҳо аз боздошти кормандони шабакаҳои барқ ва ё боз шудани парванда бар зидди онҳо барои “дуздии барқ” ва изофанависӣ дар суратҳисоби муштарӣ хабар дода буд.  

Бояд гуфт, ки “шикори барқдуздон” замоне оғоз шуд, ки соли гузашта ҷазо барои истифодаи ғайриқонунии нерӯи барқ ва саркашӣ аз пардохти пули он сангин шуд. Бар асоси Кодекси ҷиноятӣ, касоне, ки қоидаҳои истифодаи нерӯи барқро вайрон ва аз пардохти пули он саркашӣ мекунанд, аз 27 ҳазор то 90 ҳазор сомонӣ ҷарима ва ё аз 3 то 10 сол зиндонӣ мешаванд. Ҷазои маъмурӣ ё ҷарима ҳам барои “дӯздӣ”-и барқ низ зиёд шуд.

Дар Telegram, Facebook ва Instagram бо мо бимонед.

Нигина Амонқулова, овозхони маъруфи тоҷик барои талошҳояш дар роҳи посдорӣ ва густариши забони порсӣ барандаи ҷоизаи байналмилалии “Қанди порсӣ” гардидааст.

Тақдими ҷоиза рӯзи 15-уми феврал дар ҳамоиши Конуни фаромарзии ҳамёрии порсизабонон дар Донишгоҳи Вестминистери Бритониё баргузор шудааст.

Тавре зимни муаррифӣ, гуфта мешавад, Нигина Амонқулова барои густариши забони форсӣ бо эҷоди оҳангу суруд, ба вижа, иҷрои сурудҳои Мавлоно дар ҳамоиши ЮНЕСКО шоистаи ҷоизаи байналмилалии “Қанди порсӣ” шудааст.

Нигина Амонқулова дар навори қаблансабтшудае, ки он дар ҳамоиш пахш шудааст, аз чунин қадрдонӣ сипосгузорӣ карда, онро мояи ифтихораш унвон кардааст.

“Бароям мояи ифтихор ва хушҳолии бузург аст, ки имсол дар арсаи хидмати забони порсӣ ва мероси куҳани он аз роҳи мусиқӣ шоистаи дарёфти ҷоизаи бузурги “Қанди порсӣ” дониста шудам. Ин ифтихорро аз они ҳамаи ҳунармандон, дӯстдорони ин забони муштарак медонам. Ба касоне, ки бо меҳр барои зинда нигоҳ доштани ин мекӯшанд. Забони модарӣ решаи ҳувият ва пули пайванди наслҳост ва посдорӣ аз он посдорӣ аз фарҳанг ва таърихи мост. Поянда бод забони порсӣ ва сарфароз бод мардуми нозанини он!”, – мегӯяд овозхони номдори тоҷик.

Ҷоизаи байналмилалии “Қанди порсӣ”-ро аҳли Конуни фаромарзии ҳамёрии порсизабонон ба масъулини Сафорати Тоҷикистон дар Бритониё месупоранд, то онро ба овозхон расонанд.

Ғайр аз Амонқулова, ҷоизаи “Қанди порсӣ”-и имсолро инчунин Майкл Берӣ, устоди Донишгоҳи Принстони Амрико ва Латиф Нозимӣ, адабиётшинос аз Афғонистон низ соҳиб шудаанд.

Маблағи ҷоиза 500 фунт стерлинг, муодили тақрибан 700 доллар аст.

Ҳамоиши Конуни фаромарзии ҳамёрии порсизабонон аз соли 2014 дар Бритониё баргузор мешавад. Қаблан, низ ин ҷоиза ба посдорони забони форсӣ аз Тоҷикистон дода шуда буд.

Аз ҷумла, соли 2024 ин ҷоизаро ба шоири саршиноси тоҷик Гулрухсор ва яке аз мудофеони забони тоҷикӣ дар Самарқанд Амина Шарофиддинова дода буданд. Пештар Дориюши Раҷабиён, рӯзноманигори маъруф ва муҷрии барномаҳои радио ва телевизиони форсии ВВС, низ барандаи ин ҷоиза шуда буд.

Дар Telegram, Facebook ва Instagram бо мо бимонед.

ЧОРАБИНИИ МУҲИМ

– Имрӯз дар Иттифоқи нависандагон (толори хурд) ба муносибати бузургдошти Алӣ Бобоҷон, адиб ва рӯзноманигори тоҷик маҳфили ёдбуд доир мешавад. Чорабинӣ соати 14:00 оғоз шуда, вуруд озод аст.

ЯК РӮЗИ ТАЪРИХ

Соли 2003 – Маҷлиси намояндагони Маҷлиси Олии Тоҷикистон масъалаи зарурати ворид кардани тағйиру иловаҳо ба Конститутсияи Тоҷикистонро баррасӣ кард.

Соли 2012 – Дар Душанбе муҳокимаи парвандаи марги Баҳромиддин Шодиев, ки 4 ноябри соли 2011 дар бинои Раёсати корҳои дохилии ноҳияи Шоҳмансур фавтида буд, оғоз ёфт.

Соли 2018 – Дар асоси пешниҳоди ҳукумати кишвар номи шаҳри Қӯрғонтеппа ба Бохтар, шаҳри Сарбанд ба Леваканд, ноҳияи Бохтар ба Кӯшониён иваз гардид.

Соли 2019 – Шарофиддин Гадоев, яке аз намояндагони мухолифини Тоҷикистон ҳангоми сафараш ба Маскав аз ҷониби мақомоти амниятии Русия боздошт ва маҷбуран ба Тоҷикистон интиқол дода шуд.

Пас аз ду ҳафта, бо кӯмаки созмонҳои байналмилалӣ ва ҳукуматҳои ғарбӣ, ӯ ба Нидерландия, ки дар он ҷо паноҳандаи сиёсӣ буд, бозгашт. Ин ҳодиса баҳсҳои зиёдеро дар бораи муносибати ҳукуматҳои Русия ва Тоҷикистон бо мухолифини сиёсӣ ба миён овард.

Соли 2020 – Виталий Левченко сармураббии дастаи футболи “Истиқлол”-и Душанбе таъин шуд. Ӯ баъди 2 сол аз сармуррабигӣ рафт ва дубора моҳи феврали соли равон сармурабии "Истиқлол" таъин шуд.

Соли 2022 – Ҳукумати шаҳри Душанбе эълом дошт, ки нақшаи генералии шаҳр махфӣ нигоҳ дошта мешавад, "то ба дасти террористон ва экстремистон наафтад".

ШАХСИЯТҲО

Соли 1903 – Мавлуди Содиқ Ҳидоят, нависандаи шинохтаи эронӣ.

Содиқ Ҳидоят нависанда, мутарҷим ва мутафаккири эронӣ ва аз муҳимтарин адибони адабиёти муосири форсӣ маҳсуб меёбад. Ӯ бо асарҳои рамзӣ ва фалсафии худ, махсусан бо романи “Буфи кӯр” шуҳрати ҷаҳонӣ пайдо кардааст.

Асарҳои Ҳидоят бештар мавзӯъҳои танҳоӣ, ноумедӣ ва бемағзии зиндагиро инъикос мекунанд. Содиқ Ҳидоят зиндагии пуртазоди шахсӣ дошт ва дар ниҳоят дар Париж худкушӣ кард.

Асарҳои Содиқ Ҳидоят дар Тоҷикистон ҳам хонанда ва ҳаводори зиёд дорад.

Соли 1940 – Мавлуди Ҳадиса Қурбонова, Шоири халқии Тоҷикистон.

Ҳадиса Қурбонова, шоир ва нависандаи тоҷик солҳо дар нашриёти “Ирфон”, дар рӯзномаи “Пионери Тоҷикистон” ва нашриёти “Адиб” фаъолияти дошт. Ӯ аз овони мактабхонӣ ба шеъргӯйӣ пардохта, маҷмуаҳои “Паймон”, “Лоиқ намеояд дигар”-ро ба табъ расонидааст. Соли 2003 барои китоби “Лоиқ намеояд дигар” ба дарёфти Ҷоизаи ба номи Мирзо Турсунзода мушарраф шудааст.

Ӯ як қатор очерк ва драма низ эҷод кардааст. Аз ҷумла, “Машъали ҷовид”, “Дуроҳа”, “Зиндагӣ” ва “Савти нотамом” аз ин қабиланд.

Соли 1955 – Зодрӯзи Тағойназари Бақо, шоири тоҷик.

Соли 1959 – Мавлуди Фатҳулло Абдуллоев, ҳунарпешаи театру синамои тоҷик.

Фатҳулло Абдуллоев, ҳаҷвнигори тоҷик, ки бо тахаллуси Коно маъруф буд, бештар аз як моҳ пеш дар 67-солагӣ даргузашт.

Ӯ нахуст, аз соли 1980 то соли 1994 дар Театри давлатии ҷавонони Тоҷикистон фаъолият карда, баъдан ба вилояти Суғд рафт ва дар Театри давлатии мусиқӣ-мазҳакавии Камоли Хуҷандӣ кор кардааст. Сипас, бо ҳамроҳии дӯсташ Каримҷон Ғафуров театрстудияи “Коно ва Доно”-ро дар вилоят таъсис дод. Баъди таъсиси театр-студияи “Хандинкамон” ба ин театри ҳаҷвӣ мепайвандад. Ҳамзамон, мудири бахши фарҳанги шаҳри Гулистон таъйин шуда, чандин солҳо дар ин вазифа кор кардааст.

Ӯ дар чандин филмҳо аз ҷумла “Хобҳои апрелӣ”, “Ишқи ман-инқилоб”, “Биҳишт фақат барои мурдагон”, “Дарди ишқ” ва телеспектакли “Мактаби куҳна” нақш офаридааст.

Фатҳулло Абдуллоев, ба гуфтаи пайвандонаш,  рӯзи 7-уми декабри соли 2025 ба сафари ҳаҷҷи умра ба Арабистони Саудӣ рафт ва дар аснои адои он дар Мадина бемор шуда, қариб 20 рӯз дар беморхонаи ин шаҳр бистарӣ буд.

Соли 1964 – Мавлуди Сироҷиддин Муҳриддин, вазири корҳои хориҷии Тоҷикистон.

Сироҷиддин Муҳриддин соли 1986 Донишкадаи гидрометеорологии Одесса ва соли 2002 Донишгоҳи иқтисодии Тошкентро хатм кардааст.

Ӯ фаъолияти кориашро соли 1986 ба сифати муҳандис-агрометеорологи Маркази гидрометеорологияи Саридораи ҳавосанҷии ҷумҳурӣ оғоз намуда, то соли 1996 дар вазифаҳои гуногуни ин соҳа фаъолият бурдааст.

Аз соли 1996 то соли 2004 намояндаи  Тоҷикистон дар Кумитаи иҷроияи Шӯрои байнидавлатӣ оид ба мушкилоти ҳавзаи баҳри Арал, дар Кумитаи иҷроияи Фонди байналхалқии наҷоти Арал ва Раиси Кумитаи иҷроияи Фонди байналхалқии наҷоти Арал буд.

Солҳои 2004-2005 муовини якуми вазири корҳои хориҷии Тоҷикистон ва солҳои 2005-2011 намояндаи доимии Тоҷикистон дар СММ ва аз соли 2011 сафири Тоҷикистон дар Ҷумҳурии Куба буд.

Ӯ моҳи ноябри соли 2013 вазири корҳои хориҷии Тоҷикистон таъйин гардид ва то ҳол дар ин мансаб ифои вазифа мекунад.

Соли 2012 – Нуъмонҷон Тоштемиров, Ҳофизи халқии Тоҷикистон дар синни 79-солагӣ даргузашт.

Нуъмонҷон Тоштемиров, овозхони тоҷик солҳо барои рушди санъати тоҷик заҳмат кашидааст. Ӯ аввал қариб даҳ сол дар Филармонияи давлатии Тоҷикистон сарояндагӣ кард ва соли 1960 роҳбари бадеии дастаи ҳаваскорони санъати Кумитаи давлатии Тоҷикистон оид ба маълумоти касбҳои техникӣ таъин гардид. Баъдан ба дастаи мақомхонони Кумитаи телевизион ва радиои ҷумҳурӣ омада, солҳо он ҷо фаъолият дошт.

Ӯ дар тарғибу ташвиқи мероси суннатии мусиқии тоҷик – “Шашмақом” заҳмат кашид ва сурудаҳояш дар хазинаи тиллоии радиои тоҷик маҳфузанд.

Овозхон шохаҳои муҳими овозии мақомҳоро бо сабки хоси иҷро, аз ҷумла “Орази Наво”, “Савти Наво”, “Дугоҳ”, “Тулқун”, “Қӯшчинор”, “Савти Мискин”, “Сегоҳи ду”, “Савти Муноҷот” сабт кардааст.

Соли 2022 – Аловуддин Абдуллоев, ҳунарпешаи театр ва синамо, ҳаҷвнигори шинохтаи тоҷик дар синни 56-солагӣ аз олам чашм баст.

Аловуддин Абдуллоев бо барномаи “Шӯхиҳои Аловуддин”, ки тӯли 10 соли ахир дар шабакаҳои телевизионии Тоҷикистон нашр мешуд, миёни ҷомеаи Тоҷикистон маъруф буд. Ӯ сар аз моҳи сентябри 2019 яке аз доварони шоу-барномаи "Central Asia Got Talant" буд.

Ӯ фаъолиятро дар Театри мусиқӣ-мазҳакаи шаҳри Қурғонтеппа оғоз карда, дар ин ҷо ба унвони ҳунарпеша ва коргардон бомуваффақият кор карду чанд соле ҳам раҳбарии ин театрро ба дӯш дошт.

Аловуддин Абдуллоев дар намоишҳои театрии  “Моҷарои имтиҳон”, “Антигона”, “Табиби зӯракӣ”, “Ҳиллаҳои Аҷузкампир”, “Аршин мол-олон”, “Лаку Пак”, “Давлати Сомониён” нақши марказиро бозидааст. Ба ҷуз ин дар филмҳое чун  “Братан”, “Падари моҳтобӣ”, “Туҳмат”, “Чоҳ”, “Қиёми рӯз”, “Интихоби ман”, филмҳои телевизионии “Дар орзуи падар”, силсилафилми “Хуррамдиёр” нақшҳои мондагор офаридааст.

Соли дар вилояти Хатлон ҷоизаҳои раиси вилоят дар риштаи санъати театр ва ҳаҷв ба номи Аловуддин Абдуллоев таъсис дода шуд, ҳамзамон Қасри фарҳанги Бохтар ба номи ин ҳунарпеша гузошта шуд.

Ёди ҳамкасбонашро дар бораи ин ҳунарпешаи мумтози театру синамо ва ҳаҷвнигори барҷаста дар ин матлаби мо мутолиа кунед: "Рӯзе бармегардам”. Ёде аз Аловуддин Абдуллоев, ҳунарпешаи саршиноси тоҷик

САНАҲОИ МУҲИМИ ҶАҲОНӢ

17 феврали соли 1852 Осорхонаи Эрмитаж барои боздиди мардум расман боз гардид. Он соли 1764 ҳамчун маҷмӯаи хусусии малика Екатеринаи II таъсис ёфта буд. Ӯ дар Берлин аз тоҷири олмонӣ И. Готсковский маҷмӯаи 225 асари рассомони ҳолландӣ ва фламандиро харидорӣ карда буд. Дар аввал аксари ин расмҳо дар ҳуҷраҳои хоси қаср нигоҳ дошта мешуданд ва калимаи фаронсавии “Эрмитаж” низ маънои хилватро дорад.

Имрӯз Эрмитаж яке аз бузургтарин осорхонаҳои ҷаҳон буда, аз шаш бинои боҳашамат иборат аст, ки дар соҳили дарёи Нева, дар маркази Санкт-Петербург ҷойгир аст.

17 феврали соли 1600 дар Рим файласуфи итолиёвӣ Ҷордано Бруно бо иттиҳоми бидъат зинда сӯзонида шуд.

Ҷордано Бруно боварӣ дошт, кайҳон беохир аст, ситораҳо монанди Офтобанд ва зиндагӣ дар дигар сайёраҳо имконпазир аст. Ақидаҳои ӯ зидди таълимоти калисои католикӣ буданд, бинобар ин, Инквизитсия ӯро ба бидъат айбдор карда, зинда сӯзонд. Бо вуҷуди қатли ӯ, идеяҳояш дар бораи коинот ба пешрафти илм таъсири бузург расониданд.

Аз соли 2003 инҷониб 17 феврал ҳамасола дар ҷаҳон Рӯзи байналмилалии рӯҳи инсон таҷлил мегардад. Дар ин рӯз ба ҳама пешниҳод мешавад, ки соати 15:00 ду дақиқа хомӯш бошанд ва ба таври комил рӯҳи озодӣ ва сулҳро эҳсос намоянд. Ибтикоркунандаи ин чорабинии нодир Майкл Левӣ, муаллифи фалсафаи ҳаёт ва маърифат мебошад.

Ҳадафи ин рӯз он аст, ки одамон дар як лаҳзаи хомӯшӣ бо ҳам пайвастанд, зеро ин як анҷомдиҳии пурқуввати оромиш ва ҳамоҳангӣ мебошад. Ҳар қадар одамони зиёдтар дар ин мулоҳизаи хомӯшона ширкат варзанд, ҳамон қадар ҷаҳон пур аз сулҳ ва ҳамдигарфаҳмӣ мегардад.

ВАЗЪИ ҲАВО*

Дар вилояти Суғд – Ҳавои тағйирёбанда, дар баъзе ноҳияҳо борон ва дар ноҳияҳои алоҳидаи кӯҳӣ борон ва барф борида, дар баъзе ноҳияҳо тормеғ мефарояд. Ҳарорат: дар водиҳо рӯзона 10+15º гарм, дар ноҳияҳои кӯҳӣ рӯзона 2+7º гарм, дар водиҳо шабона 4+9º гарм, дар ноҳияҳои кӯҳӣ шабона -3+2º.

Дар вилояти Хатлон – Ҳавои тағйирёбанда, асосан бебориш (0,0-0,5мм) дар назар буда, дар баъзе ноҳияҳо тормеғ мефарояд. Ҳарорат: дар водиҳо рӯзона 17+22º гарм, дар ноҳияҳои доманакӯҳӣ рӯзона 9+14º гарм, дар водиҳо шабона 7+12º гарм, дар ноҳияҳои доманакӯҳӣ шабона 3+8º гарм.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: дар водиҳо рӯзона 13+18º гарм, дар ноҳияҳои кӯҳӣ рӯзона 1+6º гарм, дар водиҳо шабона 5+10º гарм, дар ноҳияҳои кӯҳӣ шабона -2+3º.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят рӯзона 3+8º гарм, дар баъзе ноҳияҳо то 10+12º гарм, дар шарқи вилоят рӯзона -2+3º, дар баъзе минтақаҳо то 5-7º сард, дар ғарби вилоят шабона 0-5º сард, дар баъзе ноҳияҳо то 3+5º гарм, дар шарқи вилоят шабона 12-17º сард, дар баъзе минтақаҳо то 20-22º сард. 

Дар шаҳри Душанбе – Ҳавои  тағйирёбандаи бебориш пешгӯӣ мешавад. Ҳарорат: рӯзона 16+18º гарм, шабона 7+9º гарм.

Дар шаҳри Хуҷанд – Ҳавои тағйирёбанда, асосан бебориш (0,0-0,5мм) пешгӯӣ мешавад. Ҳарорат: рӯзона 12+14º гарм, шабона 5+7º гарм.

Дар шаҳри Бохтар – Ҳавои тағйирёбандаи бебориш пешгӯӣ мешавад. Ҳарорат: рӯзона 20+22º гарм, шабона 8+10º гарм.

Дар шаҳри Хоруғ – Ҳавои тағйирёбандаи бебориш пешгӯӣ мешавад.. Ҳарорат: рӯзона 6+8º гарм, шабона 3-5º сард.

*Ҳарорати шабонаи ҳаво шаби 17 ба 18-уми феврал ба ҳисоб гирифта шудааст.

Дар Telegram, Facebook ва Instagram бо мо бимонед.