Се рӯз инҷониб дар шаҳри Душанбе намоишгоҳи байналмилалии “Китоби Душанбе” бо ширкати меҳмонон аз 7 кишвари хориҷа баргузор гардида истодааст. “Азия-Плюс” аз намоишгоҳ гузориш таҳия кард.
Ин намоишгоҳ дар толори барҳавои Осорхонаи миллии Тоҷикистон гузашта истодааст. Сокинон ва меҳмонони пойтахт барои тамошо ва хариди китобҳои гуногун бо забонҳои тоҷикӣ, русӣ, англистӣ ва инчунин бо хатти форсӣ меоянд.
Аксарияти тамошобинони ин намоишро донишҷуён ва омӯзгорони шаҳри Душанбе ташкил медиҳанд, аммо меҳмонон низ кам нестанд.
Дар намоиши мазкур ноширони хориҷӣ аз Русия, Беларус, Ҳиндустон, Туркия, Тукманистон, Ӯзбекистон ва Эрон иштирок карда истодаанд, ки дар баробари ба намоиш гузоштани мероси илмию адабии хеш инчунин китобҳои тозанашри худро низ ба фуруш мегузоранд.
Аммо тамошобинон аз гарон будани нархи китобҳо нигаронӣ доранд.
Максади баргузории ин намоишгоҳ таҳкиму густариши робитаҳои фарҳангии Тоҷикистон бо кишварҳои минтақа ва ҷаҳон, ташвиқу тарғиби китоб ва китобхонӣ дар ҷомеа, тарбияи ватандӯстӣ ва маънавии насли наврас тавассути мутолиаи китоб мебошад.
Ин намоишгоҳи байналмилалӣ имрӯз, 5-уми октябр, ба анҷом мерасад ва дар поёни ин маросим иштирокдорон ва фаъолони ин чорабинии фарҳангӣ бо дипломҳо ва сипосномаҳои қадрдонӣ мегарданд.
Ёдовар мешавем, ки ин намоишгоҳзи 11-уми байналмилалии “Китоби Душанбе” аст ва он соли 2013 инҷониб ҳамасола бо ширкати меҳмонону ноширон аз кишварҳои хориҷа баргузор мегардад.
