Тибқи натиҷаҳои семоҳаи аввали соли равон, бо назардошти корхонаҳо бо иштироки ҳиссаи давлат, феълан дар Тоҷикистон 174 корхонаҳои муштарак амал мекунанд.
Тавре ба «Азия-Плюс» аз Агентии омори назди президенти ҶТ хабар доданд, дар муқоиса бо моҳи декабри соли 2013 шумори корхонаҳои муштарак дар кишвар 2 адад зиёд шудааст, вале агар маълумоти оморӣ бо маълумоти «Равзанаи ягона»-и Кумитаи андози ҷумҳурӣ муқоиса шавад, тафовут ба мушоҳида мерасад ва дар Агентӣ инро чунин шарҳ медиҳанд, ки бисёре аз корхонаҳои сабтшуда барҳам хӯрда, маълумоти оморӣ корхонаҳои воқеъан амалдоштаро ба инобат мегирад.
Қобили зикр аст, ки бино ба маълумоти оморӣ, соли 1991 шумори корхонаҳои муштараки дар қаламрави Тоҷикистон таъсисдодашуда 46-торо ташкил медод. Соли 1996 шумори онҳо ба 283 адад расида, аз фурӯши маҳсулоташон дар ҳаҷми 47,5 млн. сомонӣ ё худ қариб 10 млн. доллари ИМА даромад гирифтанд.
Шурӯъ аз соли 1996 ҷараёни таъсис ва фаъолияти корхонаҳои муштарак дар Тоҷикистон тамоили манфиро касб карда, соли 2010 шумори онҳо – 147, соли 2011 – 157, соли 2012 – 158 ва соли 2013 – 172 ададро ташкил дод.
Дар Тоҷикистон корхонаҳои муштарак бо ҳиссаи сармоягузориҳои хориҷӣ аз кишварҳои гуногун амал мекунанд, ки бузургтарини онҳо корхонаҳои муштараки Тоҷикистиону Русия, Тоҷикистону Чин ва корхонаҳо бо сармоягузориҳои Эрон мебошанд.
