Хоруғ – маркази маъмурии Вилояти Мухтори Кӯҳистони Бадахшон. Шаҳрест, ки тайи солҳои ахир дар маркази таваҷчуҳӣ мақомоти қудратӣ қарор дорад… Аз рӯйдодҳои ташвишовари ахир дар Хоруғ ҳанӯз ду сол сипарӣ нагашта, ин шаҳр боз ба маркази ҳодисаҳои таҳлукаомез табдил ёфт.
Тибқи маълумоти расмӣ, тобистони соли 2012 бо мақсади дастгир кардани қотилони генерали КДАМ Абдулло Назаров, ки санаи 21-уми июл чанд километр дуртар аз маркази маъмурии ВМКБ кушта шуда буд, дар шаҳри Хоруғ амалиёти низомӣ гузаронида шуд. То имрӯз дар бораи шумораи фавтидагону захмишудагон дар ин амалиёт маълумоти саҳеҳу боъэтимод вуҷуд надорад.
Бино ба маълумоти мониторинги доиргардида соли 2013 аз ҷониби созмонҳои ҳуқуқ оид ба ин рӯйдодҳо, дар ҷараёни амалиёти махсус дар Хоруғ 18 нафар шаҳрвандони мулкӣ, аксари онҳо сокинони сосоишта ба ҳалокат расидаанд, ки бинобар сабаби огаҳӣ надоштан аз амалиёт саривақт аз шаҳр берун нарафтаанд.
Бо истинод ба намояндаи мақомоти иҷроияи маҳаллии ҳокимияти давлатӣ зикр мегардад, ки ҳангоми амалиёти махсуси рӯзи 24-уми июл 45 нафар ба ҳалокат расидаанд: 22 нафар шаҳрвандони мулкӣ ва 23 нафар хизматчиёни ҳарбӣ, аммо намояндагони мақомоти маҳаллии ҳокимияти давлатӣ ба ҳуҷҷатгузории вазъ дар минтақа машғул нашудаанд. «Бино ба изҳороти вазири мудофиа, аксари афроди рӯзи 24-уми июл ҳалокшуда ба сафи гурӯҳҳои ҷиноятпеша мансуб буда, ҳамин тариқ, ҳангоми муқовимат ба мақомоти интизомӣ кушта шудаанд», – гуфта мешавад дар гузориш.
Рӯзи 21-уми майи соли равон дар натиҷаи муноқишаи мусаллаҳона миёни кормандони милиса ва гурӯҳи ҷавонони маҳаллӣ як сокини шаҳри Хоруғ кушта ва 6 нафари дигар захмӣ шуданд, ки ду нафарашон баъдтар дар бемористон ба ҳалокат расиданд. Як корманди милиса – Давид Ниёзбеков низ ҳалок шуд. Биноҳои Шуъбаи ВКД Тоҷикистон дар шаҳри Хоруғ, суди вилоят ва прокуратура ба коми оташ рафтанд. Шаби ҷумъа ба шанбе (23-24-уми май) зимни ҳамла ба бинои Раёсати КДАМ дар ВМКБ сокини 20-солаи шаҳри Хоруғ Азамат Паллаев кушта ва боз ду нафар сокини маҳаллӣ ҷароҳат бардоштанд.
Ба андешаи коршиносон, рӯйдодҳои рухдода дар Хоруғ тасодуфӣ нестанд. Раиси Ҳизби коммунисти Тоҷикистон, вакили палатаи поёнии парлумон
Шодӣ Шабдолов мутмаин аст
, ки «ҳукумати марказии Тоҷикистонро таъҷилан бозбинии сиёсат нисбати ВМКБ дар масоили кадрӣ ва идоракунӣ зарур аст, зеро ба мисли вилоятҳои Суғду Хатлон ё водии Рашт идора кардани ин вилоят мувофиқи мақсад нест».
