Бино ба маълумоти рӯзи 8-уми июли «Парламентская газета», зимни муколамаи видеоии «Рушди стратегии муносибатҳои мутақобилаи Русия ва Тоҷикистон» узви Кумитаи умури байнулмилалии Шӯрои Федератсия
Анатолий Лиситсин
изҳор доштааст, ки Тоҷикистон шарики хеле муҳими сиёсии Русия маҳсуб меёбад.
Ба гуфтаи ӯ, хубтар мебуд агар ҷараёни ҷорӣ кардани шиносномаҳои хориҷӣ ба шаҳрвандони Тоҷикистон сабуктару беозор сурат мегирифт. «Дар Русия кммбуди қувваи корӣ ҷой дорад ва дар ин масъала ба тоҷикон ҳам бояд афзалият дода шавад», – хотиррасон намудааст сенатор.
Дар навбати худ, мудири иҷроияи Маркази сиёсатшиносии «Шимол – Ҷануб» Юлия Якушева зикр кардааст, ки «роҳи мустақил» барои Тоҷикистон маънои ҳамкорӣ бо Русияро дорад. «Дар ин бора ҳама далелҳо гувоҳӣ медиҳанд. Ҳеҷ яке аз кишварҳо имрӯз мустақилона, бидуни узвият дар сохторҳои созмону иттиҳодҳо ба рушд ноил гардида наметавонад», – иброз доштааст коршинос.
Ба гуфтаи ӯ, буҳрон дар Украина буҳрони фаъолияти бисёрҷонибаро таҷассум намуд. «Яъне имрӯз мебояд ба хулосае расид. Аз ин рӯ, барои Тоҷикистон ҳамкорӣ бо Русия аз нигоҳи стратегӣ муҳим аст», – қайд кардааст ӯ ва ба исботи гуфтаҳояш далел овардааст, ки ҳудуди 50%-и ММД Тоҷикистон маблағҳои интиқолшудаи муҳоҷирони корӣ аст.
Дар идома Якушева зикр кардааст, ки Иттиҳоди иқтисодии Авруосиё (ЕврАзЭС) алҳол ҳамкории иқтисодӣ, на сиёсиро дар назар дорад. Ӯ мутмаинона изҳор намудаст, ки барои таъмини фаъолияти муваффақонаи Иттиҳоди иқтисодии Авруосиё имрӯз мебояд аз ҳама хатарҳои имконпазир пешгирӣ кард.
«Тезонидани масъалаи ҳамроҳшавии аъзои нав ба Иттиҳод алҳол зиёдатӣ аст ва имрӯз барои рушди муносибатҳои дуҷониба миёни Тоҷикистону Русия ҳеҷ монеъае вуҷуд надорад. Ғайр аз ин, мо роҳандозии ҳамкориҳо дар сатҳҳои дигар – СҲШ ва СААД-ро низ дорем», – зикр кардааст меҳмони студия.
Дар фарҷом Якушева, маълумоти назарсанҷии ахири Маркази умумирусиягии омӯзиши афкори умум (ВЦИОМ)-ро мисол овардааст, ки мутобиқи он, русиягиҳо Тоҷикистонро дар ҳайати Иттиҳоди иқтисодии Авруосиё дидан мехоҳанд ва ба ҷонибдории он ҳатто аз Украина ҳам бештар овоз додаанд.
