Дар қаламрави шаҳри Душанбе танҳо чор иншоот дорои арзиши таърихиву фарҳангӣ мебошанд.
Муовини аввали Кумитаи сохтмон ва меъмории назди ҳукумати Тоҷикистон Нуралӣ Саидзода ба рӯзноманигорон дар ин робита иттилоъ дод, ки бо қарорҳои ҳанӯз замони Иттиҳоди Шӯравӣ қабулшудаи ҳукумати ҶШС Тоҷикистон, дар шаҳри Душанбе танҳо чор иншооте мавҷуданд, ки дорои арзиши меъмориу фарҳангӣ мебошанд.
«Инҳо бинои Кумитаи марказии Ҳизби коммунисти Тоҷикистон, бинои ҳукумат, бинои Китобхонаи ба номи Фирдавсӣ ва бинои Театри опера ва балети ба номи Садриддин Айнӣ аст», – номбар кард Саидзода.
Иншооти боқимонда дар қаламрави пойтахт, ба гуфтаи ӯ, дар сурати зарурати сохтмони биноҳои нав кӯчонида мешаванд.
Саидзода изҳор намуд, ки азбаски номгӯи иншооти дорои арзиши фарҳангиву меъморӣ ва таърихӣ ҳанӯз замони Иттиҳоди Шӯравӣ тартиб дода шудааст, ҳукумати Тоҷикистон ҳамроҳ бо Вазорати фарҳанг, Академияи илмҳо ва мақомоти маҳаллии ҳокимияти давлатӣ номгӯи нави чунин иншоотро тартиб доданианд. «Айни замон гурӯҳи кории аз ҷониби ҳукумат таъсисёфта дар ин самт машғули кор аст», – афзуд номбурда.
